පසුගිය රජය සමයේ විද්යුත් වීසා නිකුත් කිරීමේ කටයුතු පෞද්ගලික සමාගම් වෙත පැවරීමට ගෙන තිබූ තීරණයේ සහ ඒ සඳහා ඇතිකර ගෙන තිබූ ගිවිසුම්වල නීත්යානුකූල භාවය පිළිබඳව යළි සලකා බැලීමට වත්මන් අමාත්ය මණ්ඩලය තීරණය කර ඇති බව නීතිපතිවරයා අද (10) ශ්රේෂ්ඨාධිකරණයට දැනුම් දුන්නේය.
මෙම තීරණය සම්බන්ධයෙන් අභියෝගයට ලක් කරමින් ජනාධිපති නීතීඥ එම්. ඒ. සුමන්දිරන්, පාඨලී චම්පික රණවක සහ රවුෆ් හකීම් යන මහත්වරුන් විසින් ගොනු කර තිබූ මූලික අයිතිවාසිකම් පෙත්සම් අගවිනිසුරු ප්රීති පද්මන් සූරසේන, අචල වෙංගප්පුලි සහ අර්ජුන ඔබේසේකර යන මහත්වරුන්ගෙන් සමන්විත ත්රිපුද්ගල ශ්රේෂ්ඨාධිකරණ විනිසුරු මඩුල්ල ඉදිරියේ කැඳවනු ලැබීය.
අධිකරණය හමුවේ කරුණු දැක්වූ අතිරේක සොලිසිටර් ජෙනරාල් විවේකා සිරිවර්ධන මහත්මිය සඳහන් කළේ, අදාළ ගිවිසුම්වල නීත්යානුකූල භාවය පරීක්ෂා කිරීම සඳහා වත්මන් අමාත්ය මණ්ඩලය විසින් විශේෂ අනුකමිටුවක් පත් කර ඇති බවයි. එම කමිටුව මේ වන විට කරුණු අධ්යයනය කරමින් පවතින බවත්, එහි ප්රගතිය දැනුම් දීම සඳහා දිනක් ලබාදෙන ලෙසත් ඇය ඉල්ලා සිටියාය.
මෙහිදී ජනාධිපති නීතිඥ එම්.ඒ. සුමන්දිරන් මහතා අධිකරණයට පැවසුවේ, මෙම ගනුදෙනුව අවලංගු කිරීමට වත්මන් රජය තීරණය කර තිබුණද, තමන් මෙම පෙත්සම ඉදිරියට පවත්වාගෙන යාමට අපේක්ෂා කරන බවයි. වත්මන් අමාත්ය මණ්ඩල සාමාජිකයින් ද මෙම පෙත්සමේ වගඋත්තරකරුවන් ලෙස නම් කර ඇති බව ඔහු සඳහන් කළේය.
ඒ අනුව, වත්මන් අමාත්ය මණ්ඩල සාමාජිකයින්ට නොතිසි නිකුත් කරන ලෙස පෙත්සම්කාර පාර්ශවයට නියම කළ විනිසුරු මඩුල්ල, පෙත්සම යළි සැප්තැම්බර් මස 29 වන දින කැඳවන ලෙස නියෝග කළේය.
