ශ්රී ලංකා සිවිල් ගුවන් සේවා අධිකාරිය (CAASL) විසින් 2026 ජූනි 23 දින ආසියානු සහ පැසිෆික් කලාපීය සහයෝගී ගුවන් ආරක්ෂක වැඩසටහනේ (CASP-AP) 21 වන මෙහෙයුම් කමිටු රැස්වීම සාර්ථකව ආරම්භ කරන ලදී. මෙම සමාරම්භක උත්සවයේ විශේෂ අවස්ථාවක් ලෙස, 2026–2027 කාලසීමාව සඳහා CASP-AP සභාපති ධුරය සිංගප්පූරුවෙන් ශ්රී ලංකාව වෙත නිල වශයෙන් භාරදීම සිදු විය. ඒ අනුව ශ්රී ලංකා සිවිල් ගුවන් සේවා අධ්යක්ෂ ජනරාල් සහ ප්රධාන විධායක නිලධාරී කපිතාන් දමින්ද රඹුක්වැල්ල මහතා නව සභාපතිවරයා ලෙස එම ධුරයේ වැඩ භාරගත්තේය.
කලාපීය ගුවන් ආරක්ෂක නායකයින්, ප්රතිපත්ති සම්පාදකයින් සහ තාක්ෂණික විශේෂඥයින් ඇතුළු සාමාජික සහ සහභාගී රාජ්යයන් 22ක නියෝජිතයින් 70කට අධික පිරිසක් මෙම රැස්වීමට එක්ව සිටිති. මෙහිදී අදහස් දැක්වූ කපිතාන් දමින්ද රඹුක්වැල්ල මහතා, ගුවන් ආරක්ෂාව සම්බන්ධ ඉහළම ප්රමිතීන් පවත්වාගෙන යාම සඳහා ශ්රී ලංකාවේ ඇති කැපවීම අවධාරණය කළ අතර, විකාශනය වන ගුවන් ආරක්ෂක අභියෝගවලට මුහුණ දීම සඳහා සහයෝගීතාව සහ දැනුම හුවමාරු කර ගැනීමේ වැදගත්කම පෙන්වා දුන්නේය. එමෙන්ම, ICAO ආසියා හා පැසිෆික් කලාපීය කාර්යාලයේ අධ්යක්ෂ ටාඕ මා මහතා ශ්රී ලංකාවේ මෙම නායකත්වය සහ කලාපීය සහයෝගීතාව ප්රවර්ධනය කිරීම අගය කරමින් සුබ පැතුම් එක් කළේය.
මෙම 21 වන මෙහෙයුම් කමිටු රැස්වීම, CASP-AP වැඩසටහනේ ප්රගතිය සමාලෝචනය කිරීමටත්, උපායමාර්ගික ප්රමුඛතා හඳුනා ගැනීමටත් සහ ජාත්යන්තර ගුවන් ආරක්ෂක ප්රමිතීන් ඵලදායීව ක්රියාත්මක කිරීම සඳහා සාමාජික රාජ්යයන් අතර සහයෝගීතාව තවදුරටත් ශක්තිමත් කිරීමටත් වැදගත් වේදිකාවක් සපයයි. ආසියා-පැසිෆික් කලාපය තුළ ගුවන් ආරක්ෂාව ශක්තිමත් කිරීම සඳහා මෙම පුළුල් ජාත්යන්තර සහභාගීත්වය බෙහෙවින් ඉවහල් වනු ඇති බවට අපේක්ෂා කෙරේ.
