ශ්රී ලංකා මහ බැංකුව විසින් බාහිර පාර්ශ්වයන් වෙතින් සංඛ්යාලේඛන සහ තොරතුරු රැස් කිරීම විධිමත් කිරීම සඳහා පනවා ඇති නව රීති මාලාව පාර්ලිමේන්තුවේ අනුමැතිය සඳහා ඉදිරිපත් කිරීමට අමාත්ය මණ්ඩල අනුමැතිය හිමි වී තිබේ. 2023 අංක 16 දරන ශ්රී ලංකා මහ බැංකු පනතේ විධිවිධාන ප්රකාරව සකස් කරන ලද මෙම රීති, මුදල්, ක්රමසම්පාදන සහ ආර්ථික සංවර්ධන අමාත්යවරයා ලෙස ජනාධිපතිවරයා විසින් අමාත්ය මණ්ඩලය වෙත ඉදිරිපත් කරනු ලැබීය.
මෙම නව රීති මාලාව 2026 අංක 01 දරන “ශ්රී ලංකා මහ බැංකුව විසින් සංඛ්යාලේඛන සහ තොරතුරු රැස් කිරීම පිළිබඳ රීති” ලෙස හඳුන්වන අතර, ඒ සම්බන්ධ අති විශේෂ ගැසට් නිවේදනය 2026 මාර්තු 12 වන දින ප්රකාශයට පත් කර ඇත. මහ බැංකුවේ නෛතික කාර්යයන් සහ ප්රධාන කර්තව්යයන් ඉටු කිරීම සඳහා අවශ්ය දත්ත රැස් කිරීමේදී අනුගමනය කළ යුතු ක්රියා පටිපාටිය මෙමඟින් පැහැදිලි කෙරේ.
විශේෂයෙන්ම තොරතුරු සැපයිය යුතු ආකෘතිය, වාර්තා කිරීමට බැඳී සිටින පාර්ශ්වයන්, දත්තවල රහස්යභාවය සුරැකීම සහ නියමිත පරිදි තොරතුරු ලබා නොදෙන පාර්ශ්වයන්ට එරෙහිව ගනු ලබන පරිපාලනමය ක්රියාමාර්ග පිළිබඳව ද මෙහි ප්රතිපාදන සලසා ඇත. මෙම පියවර හරහා මෙරට ආර්ථික සහ මූල්ය දත්ත පද්ධතිය වඩාත් විනිවිදභාවයකින් සහ විධිමත්ව පවත්වාගෙන යාමට මහ බැංකුව අපේක්ෂා කරයි.
