තායිවාන ජනාධිපති ලායි චිං-තේ (Lai Ching-te) රැගත් ගුවන් යානයට තම ගුවන් සීමා භාවිතා කිරීමට අවසර ලබා නොදුන් රටවල් තුනක් අගය කිරීමට චීනය අද (අප්රේල් 22) පියවර ගෙන තිබේ. චීනය පවසන්නේ මෙය අන්තර්ජාතික සබඳතාවලදී “එක් චීනයක්” (One-China principle) යන ප්රතිපත්තිය පිළිගැනීමක් බවයි.
තායිවාන ජනාධිපතිවරයා මේ සතියේ අප්රිකාවේ එස්වාටිනි (Eswatini) රාජ්යයේ සංචාරයක නිරත වීමට සැලසුම් කර තිබුණි. ඒ සඳහා ගමන් කිරීමට නියමිතව තිබූ සීෂෙල්ස්, මුරුසිය සහ මැඩගස්කරය යන රටවල් තුන සිය ගුවන් සීමා භාවිතා කිරීමට ලබා දී තිබූ අවසරය අවලංගු කර ඇති බව තායිවානය චෝදනා කරයි.
බීජිං නුවර පැවති මාධ්ය හමුවකදී චීනයේ තායිවාන කටයුතු පිළිබඳ කාර්යාලය ප්රකාශ කළේ, මෙම රටවල් ගත් තීරණය පිළිබඳව තමන් බෙහෙවින් අගය කරන බවයි. මෙම තීරණය සඳහා චීනය විසින් එම රටවලට ආර්ථික බලපෑම් එල්ල කළ බවට තායිවානය කරන චෝදනා චීනය ප්රතික්ෂේප කර සිටී.
තායිවාන ජනාධිපතිවරයා එස්වාටිනි රාජ්යයට යාමට සැලසුම් කළේ එරට තෙවැනි එම්ස්වාටි (Mswati III) රජුගේ අභිෂේකයේ 40 වැනි සංවත්සර උත්සවයට සහභාගී වීම සඳහාය. එස්වාටිනි යනු තායිවානය සමඟ තවමත් නිල රාජ්යතාන්ත්රික සබඳතා පවත්වන ලොව සීමිත රටවල් කිහිපයෙන් එකකි.
මෙම සිදුවීම වාර්තා වන්නේ චීන ජනාධිපති ෂී ජින්පින් සහ තායිවාන විපක්ෂ නායිකා චෙං ලි-වුං (Cheng Li-wun) අතර බීජිං නුවරදී පැවති හමුවකින් අනතුරුව තායිවානය සඳහා චීනය විසින් නව සහන කිහිපයක් ප්රකාශයට පත් කර සතියක් වැනි කෙටි කාලයකිනි.
