කොමර්ෂල් බැංකුවේ ප්රධාන මෙහෙයුම් නිලධාරී සහ විධායක අධ්යක්ෂ එස්. ප්රභාගර් මහතා වසර 30කට අධික සේවා කාලයක් සම්පූර්ණ කරමින් ලබන අප්රේල් 26 වනදා විශ්රාම ගැනීමට නියමිත බව එම බැංකුව නිල වශයෙන් නිවේදනය කර තිබේ. 2022 වසරේදී ඔහු ප්රධාන මෙහෙයුම් නිලධාරී ධුරයට පත්වූ අතර, බැංකුවේ දේශීය හා ජාත්යන්තර වර්ධනය උදෙසා ඔහු සුවිශේෂී මෙහෙවරක් ඉටු කළ ප්රවීණ බැංකු නිලධාරියෙකි.
ප්රභාගර් මහතාගේ වෘත්තීය ජීවිතයේ කැපී පෙනෙන සන්ධිස්ථානයක් ලෙස බංග්ලාදේශයේ කොමර්ෂල් බැංකු මෙහෙයුම් සාර්ථකව මෙහෙයවීම හැඳින්විය හැකිය. එහිදී ශාඛා දෙකක් ලෙස පැවති ජාලය ශාඛා 19ක් දක්වා ව්යාප්ත කරමින්, බංග්ලාදේශයේ පවතින විදේශීය බැංකු අතර තෙවනියට වැඩිම ලාභ ලබන බැංකුව බවට එය පත් කිරීමට ඔහු සමත් විය. විශ්රාම යන අවස්ථාව වන විට ඔහු මාලදිවයින කොමර්ෂල් බැංකුවේ සහ ලංකා ෆිනෑන්ෂල් සර්විසස් බියුරෝ ආයතනයේ අධ්යක්ෂවරයෙකු ලෙස ද කටයුතු කරමින් සිටියේය. ශ්රී ලංකාව තුළ බ්ලොක්චේන් (blockchain) තාක්ෂණය ක්රියාත්මක කිරීම සඳහා මහ බැංකුව විසින් පත් කළ කමිටුවේ සභාපතිත්වය දැරුවේ ද ඒ මහතාය.
