English 
ක්‍රවුන් ප්‍රින්සස් එයි- වරාය අධිකාරිය වැඩ අරඹයි
ශ්රී ලංකාව තුළ කොරෝනා වයිරස ව්‍යාප්තිය පාලනයවීමත් සමඟ ශ්රී ලංකා වරාය අධිකාරිය ද සිය මෙහෙයුම් කටයුතු ආරම්භ කර ඇත.
ඒ අනුව කොළඹ වරාය වෙත ඊයේ (28) ‘ක්‍රවුන් ප්‍රින්සස්’ නැමති ඇමෙරිකානු මගී නෞකාව සුඛෝපභෝගී මගී නෞකාව පැමිණියේය.
එය මෙරටට පැමිණ ඇත්තේ දකුණු අප්‍රිකාවේ කේප් ටවුන් වරායෙහි සිට දින 15ක පමණ ගමනක් අවසන් කරමින්ය.
මෙහි පිලිපීන ජාතිකයින් 1,466ක්, ඉන්දියානු ජාතිකයින් 380ක්, ඉන්දුනීසියානු 113ක්, ඉතාලි 28ක්, චීන ජාතික 22ක් හා ඕස්ටේ්‍රලියානු, යුක්රේන්, බල්ගේරියානු, ජපන්, දකුණු අප්‍රිකා ආදී රටවල් 28ක වැසියන් මෙම නෞකාවේ කාර්ය මණ්ඩලය ලෙස කටයුතු කරන අතර එය කාමර දෙදහසකට වැඩි ප්‍රමාණයකින් සමන්විතය.
එහි සිටින කාර්ය මණ්ඩල සාමාජිකයින් විවිධ රටවල අය වන අතර ඔවුන් සිය රටවල් වෙත යැවීම අද (29) සිට ශ්රී ලංකන් ගුවන් සේවයට අයත් ගුවන්යානා මගින් සිදුකෙරෙන බව වරාය අධිකාරියේ ජ්‍යෙෂ්ඨ නිලධාරියෙක් පැවසීය.
මේ කාර්ය මණ්ඩලය අතරින් ඉන්දියානු ජාතිකයින් 310 දෙනකු ශ්රී ලංකන් ගුවන් සමාගමට අයත් විශේෂ ගුවන් යානයකින් අද (29) සියරට බලා ගමන් ගන්නා බව ද එම නිලධාරියා පැවසීය.
මෙය විශේෂ අවසරයක් මත මාස ගණනාවක් රට රටවල සංචාරයක නිරත වූ නෞකාවක් බව ද එම නිලධාරියා සඳහන් කළේය.
ජනාධිපති ගෝඨාභය රාජපක්ෂ, ශ්රී ලංකා වරාය අධිකාරියේ සභාපති, විශ්‍රාමික යුද හමුදාපති, ජෙනරාල් දයා රත්නායක යන මහත්වරුන්ගේ උපදෙස් මත ආගමන විගමන පාලක ජනරාල් සරත් රූපසිරි, නියෝජ්‍ය පාලක කේසි ප්රනාන්දු සහ තොටුපල හා වරාය භාර සහකාර පාලක ජයන්ත රත්නායක යන මහත්වරුන්ගේ අධීක්‍ෂණය යටතේ මෙම කටයුතු සිදුකෙරේ.
සෙසු පිරිසද ඉදිරියේදී ගුවන් මගින් සිය රටවල් බලා පිටත් කිරීමෙන් අනතුරුව නෞකාව ඇමෙරිකාව බලා ගමන් අරඹනු ඇතැයි ද එම නිලධාරියා පැවසීය.
මෙම මෙහෙයුම් කටයුතු සෞඛ්‍ය අංශවල උපදෙස් අනුව ඉතා ආරක්‍ෂාකාරී අයුරින් සිදුවන බව කී හෙතෙම එහි නිෂ්කාෂණ කටයුතු හා බැඳුම්කර ලබාගැනීම සිදුකරන්නේ ද ආගමන විගමන නිලධාරීන් පිරිසක් නෞකාව තුළට ගොස් බව ප්‍රකාශ කළේය.
ඒ අනුව විශේෂිත ආරක්ෂක ඇඳුම්වලින් සැරසුණු නිලධාරීන් හය දෙනෙකු සමඟ තමන් ද වරාය භාර නියෝජ්‍ය සෞඛ්‍ය අධ්යක්ෂ විශේෂඥ වෛද්‍ය රොෂාන් සම්පත් මහතාගේ අධීක්‍ෂණය යටතේ මෙම කටයුතු සිදුකළ බව ද ඔහු කීවේය.
මෙවැනි තවත් නෞකාවක් ලබන 31 වැනිදාත් කොළඹ වරායට පැමිණෙන බව හෙතෙම පැවසීය.
කොරෝනා වසංගතය සමඟ ලෝකය මුහුණ පා ඇති තත්ත්වය හමුවේ ශ්රී ලංකා වරාය අධිකාරිය හා ගුවන් සේවය විසින් කරන මෙම කාර්යය මානුෂීය මෙහෙයුමක් බව ද ඔහු පැවසීය.
මෙයින් ශ්රී ලංකාවට ආදායමක් මෙන්ම මෙවැනි මානුෂීය මෙහෙයුමක් තුළින් ලෝකය තුළ ශ්රී ලංකාව ගැන යහපත් ප්‍රතිරූපයක් ද ගොඩනැගෙන බව ජ්‍යෙෂ්ඨ නිලධාරියා සඳහන් කළේය.