මාසික ඉන්ධන මිල සූත්රයට අනුව අගෝස්තු මාසය සඳහා ඉන්ධන මිලෙහි කිසිදු සංශෝධනයක් සිදු නොකිරීමට රජය තීරණය කර ඇති බව ලංකා ඛනිජ තෙල් නීතිගත සංස්ථාව පවසයි. අද මධ්යම රාත්රියේ සිට ක්රියාත්මක වීමට නියමිතව තිබූ මිල සංශෝධනයේදී පවතින මිල ගණන් එලෙසම පවත්වාගෙන යාමට තීරණය වී තිබේ.මේ පිළිබඳව වැඩිදුරටත් කරුණු පැහැදිලි කළ ලංකා ඛනිජ තෙල් නීතිගත සංස්ථාවේ සභාපති ඩී.ජේ. රාජකරුණා මහතා සඳහන් කළේ, ලෝක වෙළෙඳපොළේ ඉන්ධන මිල ඉහළ ගියද එහි බර ජනතාව මත පැටවීමට රජය සූදානම් නැති බවයි. විශේෂයෙන්ම ඩීසල් ලීටරයකින් මේ වන විට සංස්ථාව රුපියල් 70.63 ක පාඩුවක් ලබන බවත්, එම පාඩුව සංස්ථාව විසින් දරා ගනිමින් මිල වැඩි නොකිරීමට පියවර ගත් බවත් ඔහු අවධාරණය කළේය.ලෝක වෙළෙඳපොළේ පවතින යුදමය වාතාවරණය හමුවේ ඉන්ධන මිල ගණන් විශාල ලෙස ඉහළ ගොස් ඇති බව පෙන්වා දුන් සභාපතිවරයා, යුද්ධය ආරම්භ වීමට පෙර පැවති මිලට සාපේක්ෂව ලෝක වෙළෙඳපොළේ ඩීසල් මිල සියයට 59 කින් පමණ ඉහළ ගොස් ඇති බව ප්රකාශ කළේය. කෙසේ වෙතත්, දේශීය වෙළෙඳපොළේ ඩීසල් මිල ඉහළ නංවා ඇත්තේ සියයට 35.9 කින් පමණක් බව ඔහු පෙන්වා දුන්නේය.පෙට්රල් මිල සම්බන්ධයෙන් අදහස් දක්වමින් ඔහු කියා සිටියේ, ජූලි මාසය ආරම්භයේදී මිලෙහි යම් අඩුවීමක් දක්නට ලැබුණද, එය පෙබරවාරි මාසයට සාපේක්ෂව තවමත් සියයට 41.35 ක ඉහළ මට්ටමක පවතින බවයි. පවතින ගෝලීය තත්ත්වය, රක්ෂණ ගාස්තු සහ ප්රවාහන ගාස්තු ඉහළ යාම හේතුවෙන් ඉදිරියේදී ඉන්ධන මිලෙහි විශාල අඩුවීමක් බලාපොරොත්තු විය නොහැකි බවද ඔහු සඳහන් කළේය.ඩීසල් මිල ඉහළ දැමීම රටේ සමස්ත ආර්ථිකයටම සෘජුව බලපාන බැවින්, ආර්ථික ස්ථාවරත්වය ආරක්ෂා කර ගැනීම වෙනුවෙන් මෙම තීරණය ගත් බව සභაපතිවරයා වැඩිදුරටත් ප්රකාශ කළේය. රජය විසින් මීට පෙර අප්රේල්, මැයි සහ ජූනි මාසවලදී ඉන්ධන සඳහා සහනාධාර ලබා දුන් බවත්, පවතින අසීරුතා මධ්යයේ වුවද ජනතාවට සහන සැලසීම රජයේ අරමුණ බවත් ඔහු මෙහිදී සිහිපත් කළේය.
