ශ්‍රී ලංකා නාවික හමුදාවේ වයඹ සහ උතුරු මැද නාවික විධානයන් විසින් භාවිත කරනු ලබන ඉඩම් නිරීක්ෂණය කිරීමේ අරමුණින් ආරක්ෂක නියෝජ්‍ය අමාත්‍ය මේජර් ජෙනරාල් අරුණ ජයසේකර මහතා මන්නාරම් දිස්ත්‍රික්කයේ ක්ෂේත්‍ර චාරිකාවක නිරත විය. මෙම සංචාරය සඳහා සමුපකාර සංවර්ධන නියෝජ්‍ය අමාත්‍ය උපාලි සමරසිංහ, වන්නි දිස්ත්‍රික් පාර්ලිමේන්තු මන්ත්‍රී මයිල්වාගනම් ජෙගදීස්වරන් යන මහත්වරුන් ඇතුළු රාජ්‍ය නිලධාරීන් පිරිසක් සහභාගි වූහ.
මත්ද්‍රව්‍ය උවදුර තුරන් කිරීම සඳහා මන්නාරම් දිස්ත්‍රික්කය තුළ නාවික හමුදාව දක්වන දායකත්වය සහ මුහුදු සීමාවන් හා වෙරළබඩ ආරක්ෂාව ශක්තිමත් කිරීමට ගෙන ඇති ක්‍රියාමාර්ග සමාලෝචනය කරන ලදී. නාවික ප්‍රදේශ භාර ආඥාපතිවරුන් විසින් සිදු කරන මෙහෙයුම්වල ප්‍රගතිය පිළිබඳව අමාත්‍යවරයා දැනුවත් වූ අතර, ඒවායේ ඵලදායීතාව වැඩි දියුණු කිරීම සඳහා අවශ්‍ය උපදෙස් ලබා දුන්නේය.
මුල්ලික්කුලම්, සිලාවතුර, තලෛමන්නාරම, වන්කාලපාඩුව සහ පල්ලිමුනෙයි යන ප්‍රදේශවල නාවික හමුදාව දැනට භාවිත කරන ඉඩම් නිරීක්ෂණය කරමින්, එම ප්‍රදේශවල ජනතාව සමඟ සුහද සාකච්ඡාවක නිරත විය. විශේෂයෙන්ම ධීවර ප්‍රජාව මුහුණ දෙන ගැටලු, නිවාස ගැටලු සහ ප්‍රජා අභියෝග පිළිබඳව අමාත්‍යවරයාගේ අවධානය යොමු විය. අදාළ රාජ්‍ය බලධාරීන් සමඟ සම්බන්ධීකරණය වෙමින් මෙම ගැටලු විසඳීම සඳහා කඩිනම් ක්‍රියාමාර්ග ගැනීමට නියෝජ්‍ය අමාත්‍යවරයා පියවර ගත්තේය.
මෙම සංචාරය මගින් ආරක්ෂක අංශවල මෙහෙයුම් කාර්යක්ෂමතාව ඉහළ නැංවීමට සහ දේශීය ජනතාවගේ ගැටලු විසඳීම සඳහා රාජ්‍ය මැදිහත්වීම තහවුරු කිරීමට අපේක්ෂා කෙරේ.
