වසරේ මේ දක්වා කාලය තුළ සංවිධානාත්මක අපරාධ කල්ලි විසින් බෝම්බ ප්රහාර 6ක් සිදු කර ඇති අතර, ඉන් තුනක්ම ගල්කිස්ස පොලිස් කොට්ඨාසය තුළ සිදුව තිබීම විශේෂත්වයකි. බස්නාහිර පළාත තුළ පාතාල කල්ලි විසින් බෝම්බ භාවිත කිරීම සම්බන්ධයෙන් පොලිසියේ දැඩි අවධානය යොමුව ඇති අතර, යුද සමයේදී එල්ටීටීඊයෙන් ලබාගත් බවට සැක කෙරෙන බෝම්බ මෙලෙස භාවිත කරන බවට සැකයක් මතුව ඇත. මේ අතර, දෙහිවල සිරිසඟබෝ මාවත ප්රදේශයේ නිවසකට අද (11) අලුයම එල්ල වූ අත්බෝම්බ ප්රහාරයකින් 17 හැවිරිදි කසුන් රශ්මික හා 11 හැවිරිදි දුමින්ද ගිහාන් යන සහෝදර දරුවන් දෙදෙනා ජීවිතක්ෂයට පත්ව ඇති අතර, ඔවුන්ගේ 55 හැවිරිදි පියා වන නලින් තුසන්ත පෙරේරා තුවාල ලබා රෝහල්ගත කර තිබේ.
පියාට එරෙහිව කිසිදු අපරාධ ඉතිහාසයක් හෝ චෝදනාවක් නොමැති අතර, අසල්වැසි නිවසේ වාසය කරන ඥාතීන් පිරිසකට මත්ද්රව්ය ජාවාරම් සම්බන්ධයෙන් චෝදනා පැවතීම සහ ඔවුන් විදෙස්ගතව සැඟව සිටින අපරාධකරුවෙකු වන “බඩෝවිට අසංක” යන්නාගේ සමීපතමයන් වීම හේතුවෙන් නිවස මාරු වී මෙම ප්රහාරය අත්වැරදීමකින් එල්ල වන්නට ඇති බවට පොලිසිය සැක කරයි. පෙරේදා කළුබෝවිල පිහිටි නිවසකට බඩෝවිට අසංකගේ පාර්ශ්වය විසින් එල්ල කළ බෝම්බ ප්රහාරයකට පළිගැනීමක් ලෙස මෙම ප්රහාරය එල්ල කර ඇති බවට තොරතුරු ලැබී ඇති අතර, සිද්ධිය සම්බන්ධයෙන් පොලිස් කණ්ඩායම් තුනක් මගින් විමර්ශන ක්රියාත්මක වන අතරතුර, ප්රහාරය සඳහා යොදාගත් ත්රිරෝද රථය පහළ බෝපේ ප්රදේශයේදී දමාගොස් තිබියදී සොයාගෙන ඇත.
