උණ රෝගය වැළඳී ඇති දරුවන් ස්වයං ප්රතිකාර හෝ අත්බෙහෙත්වලට යොමු නොවී කඩිනමින් ළඟම ඇති රජයේ රෝහල වෙත ගොස් වෛද්ය ප්රතිකාර ලබා දෙන ලෙස සෞඛ්ය අංශ දෙමාපියන්ගෙන් ඉල්ලා සිටී.
කොළඹ රිජ්වේ ආර්යා ළමා රෝහලේ අධ්යක්ෂ විශේෂඥ වෛද්ය ප්රදීප් රත්නසේකර මහතා පෙන්වා දෙන්නේ මේ වන විටත් එම රෝහලේ ඩෙංගු රෝගී දරුවන් 50ක් පමණ ප්රතිකාර ලබන අතර, එයින් හතරෙන් එකක් පමණ අසාධ්ය තත්ත්වයේ පසුවන බවයි. පැය 24කට වඩා පවතින උණ රෝගයක් ඇත්නම් ප්රමාද වී රිජ්වේ ආර්යා රෝහල වෙත පැමිණීමෙන් තොරව, ළඟම ඇති රෝහලට දරුවා රැගෙන ගොස් වෛද්ය උපදෙස් ලබා ගන්නා ලෙස ඔහු අවධාරණය කරයි.
මේ අතර, ජාතික ඩෙංගු මර්දන ඒකකයේ ප්රජා වෛද්ය විශේෂඥ ප්රශිලා සමරවීර මහත්මිය සඳහන් කළේ ගම්පහ, කොළඹ, මාතර, නුවර, කළුතර, රත්නපුර, ගාල්ල, කුරුණෑගල, කෑගල්ල, හම්බන්තොට සහ පුත්තලම යන දිස්ත්රික්කවලින් වැඩි වශයෙන් ඩෙංගු රෝගීන් වාර්තා වන බවයි. මේ දක්වා සිදුව ඇති ඩෙංගු මරණ 61න් 47ක්ම කාන්තාවන් වීම විශේෂයෙන් සැලකිල්ලට ගත යුතු කරුණක් බවද ඇය පෙන්වා දෙයි.
