අතීතයේ සිදු වූ සියලු අඩුපාඩු සහ අතපසුවීම් නිවැරදි කරගනිමින්, ජාතියක් ලෙසත් පුද්ගලිකවත් අලුත් ගමනක් ආරම්භ කිරීමට සිංහල හා දෙමළ අලුත් අවුරුද්ද මනා අවස්ථාවක් සලසන බව සර්වජන බලයේ නායක, පාර්ලිමේන්තු මන්ත්රී දිලිත් ජයවීර මහතා පවසයි. අලුත් අවුරුදු සුබ පැතුම් පණිවුඩයක් නිකුත් කරමින් ඔහු පෙන්වා දෙන්නේ සිංහල අවුරුද්ද යනු හුදෙක් සංස්කෘතික මංගල්යයක් පමණක් නොව, ඒ වටා දියුණු විද්යාත්මක පසුබිමක් ද පවතින උරුමයක් බවයි.
කාර්යබහුල ජීවිතවලට විවේකයක් ලබා දෙමින් ආදරණීයයන් සමඟ කාලය ගත කිරීමටත්, කෘතගුණ සැලකීම වැනි උතුම් ගුණාංග මතු පරපුරට දායාද කිරීමටත් මෙම උත්සවය ඉඩ සලසන බව මන්ත්රීවරයා සඳහන් කළේය. මුළු රටක්ම එකම මොහොතක චාරිත්ර වාරිත්ර ඉටු කරන මෙවැනි උතුම් උත්සවයක් ලොව වෙනත් කිසිදු රටක දැකිය නොහැකි බවත්, එය ශ්රී ලාංකික අනන්යතාව ලොව ඉදිරියේ ඔසවා තබන බවත් ඔහු වැඩිදුරටත් පැවසීය.
මෙවර අලුත් අවුරුද්ද සැමරීමට රජය දක්වන උනන්දුව අඩු බවටත්, සංස්කෘතික උරුමයන් පිළිබඳ සැක ඇති කිරීමට ඇතැමුන් කටයුතු කරන බවටත් විවේචනය කළ දිලිත් ජයවීර මහතා, නිවැරදි නැකැත් පත්රය ජාතියට තිළිණ කිරීමට තම පාර්ශවය මැදිහත් වූ බව ද සිහිපත් කළේය. ශ්රී ලංකාවාසී සියලු දෙනාට සතුට සෞභාග්යය පිරි සුබ අලුත් අවුරුද්දක් වේවායි ප්රාර්ථනා කරමින් ඔහු සිය පණිවුඩය අවසන් කර තිබේ.
