විද්යුත් වාහන භාවිතය ඉහළ නැංවීම පුනර්ජනනීය බලශක්ති ක්ෂේත්රයට මෙන්ම රටේ ආර්ථිකයටත් ඉතා වැදගත් බව බලශක්ති අමාත්ය අනුර කරුණාතිලක මහතා පවසයි. අමාත්යවරයා මේ බව සඳහන් කළේ විද්යුත් වාහන ආරෝපණය සඳහා අවශ්ය යටිතල පහසුකම් සංවර්ධනය කිරීමට අදාළ ජාතික ප්රතිපත්තිය සකස් කිරීම වෙනුවෙන් කොළඹදී පැවැති විශේෂ පාර්ශ්වකරුවන්ගේ වැඩමුළුව ආරම්භ කරමිනි.
දැනට මෙරට භාවිත වන වාහනවලින් විද්යුත් වාහන ප්රතිශතය පවතින්නේ 1%ක් වැනි අඩු මට්ටමක බව පෙන්වා දෙන අමාත්යවරයා, එය යම් ප්රමාණයකින් වැඩි කරගෙන එම වාහන ආරෝපණය සඳහා පුනර්ජනනීය බලශක්තිය භාවිත කළ හැකි නම් පොසිල ඉන්ධන සඳහා වැය වන රුපියල් බිලියන ගණනක මුදලක් ඉතිරි කර ගත හැකි බව ප්රකාශ කරයි. එමෙන්ම එමගින් රටේ පුනර්ජනනීය බලශක්ති විභවය උපරිමයෙන් ප්රයෝජනයට ගනිමින් ජාතික ආර්ථිකයට ඉහළ දායකත්වයක් ලබා දිය හැකි බවද ඔහු පෙන්වා දෙයි.
විද්යුත් වාහන භාවිතයේ වර්ධනයට බාධාවී ඇති සාධක හඳුනාගෙන ඒවා මඟහරවා ගැනීමට අවශ්ය පියවර ගන්නා බව අමාත්යවරයා වැඩිදුරටත් අවධාරණය කළේය. ඒ සඳහා ඉදිරියේදී විදුලි ඉල්ලුම අවම වන දිවා කාලයේදී වාහන ආරෝපණය සඳහා අඩු ගාස්තු ක්රමයක් හඳුන්වා දීමටත්, නාගරික ප්රදේශවලින් පිටත ද ආරෝපණ මධ්යස්ථාන ජාලයක් ස්ථාපිත කිරීමටත්, ජාතික විදුලි බල පද්ධතිය තවදුරටත් ශක්තිමත් කිරීමටත් පියවර ගැනේ.
බලශක්ති අමාත්යාංශය, එක්සත් ජාතීන්ගේ සංවර්ධන වැඩසටහන (UNDP) සහ දේශගුණික සහ පිරිසිදු වායු පිළිබඳ සන්ධානය (CCAC) එක්ව මෙම වැඩමුළුව සංවිධානය කර ඇත. මේ සඳහා මහජන උපයෝගීතා කොමිෂන් සභාව, ශ්රී ලංකා සුනිත්ය බලශක්ති අධිකාරිය ඇතුළු ක්ෂේත්රයට සම්බන්ධ ප්රධාන ආයතන රැසක් දායකත්වය ලබා දෙයි. මෙම අවස්ථාව සඳහා නියෝජ්ය බලශක්ති අමාත්ය අර්කම් ඉල්යාස්, බලශක්ති අමාත්යාංශයේ ලේකම් රසල් අපෝන්සු සහ එක්සත් ජාතීන්ගේ සංවර්ධන වැඩසටහනේ නේවාසික නියෝජිත අසුසා කුබෝටා යන මහත්ම මහත්මීන් ඇතුළු පිරිසක් සහභාගී වූහ.
