ශ්රී ලංකාවේ වැඩිහිටි ජනගහනයෙන් දැනටමත් 10%ක් පමණ වකුගඩු රෝගයට ගොදුරු වී ඇති බවත්, හඳුනා නොගත් රෝගීන් සංඛ්යාව මීට වඩා බොහෝ සෙයින් වැඩි විය හැකි බවත් විශේෂඥ වකුගඩු රෝග පිළිබඳ වෛද්ය අනුපමා ද සිල්වා මහත්මිය අනතුරු අඟවයි.
ශ්රී ලංකාවේ වකුගඩු රෝගය ව්යාප්ත වීමට ප්රධාන හේතුව ලෙස දියවැඩියාව හඳුනාගෙන තිබේ. ආසියානු රටවල් අතරින් වැඩිම දියවැඩියා රෝගීන් ප්රතිශතයක් වාර්තා වන්නේ ශ්රී ලංකාවෙනි. රටේ ජනගහනයෙන් 25%ක් පමණ දියවැඩියා රෝගයෙන් පෙළෙන අතර, දියවැඩියාව නිසි ලෙස පාලනය නොකිරීම වකුගඩු රෝගය උත්සන්න වීමට ප්රධාන දායකත්වයක් සපයයි.
මීට අමතරව අධික රුධිර පීඩනය, හෘදයාබාධ සහ විෂ ශරීරගත වීම වැනි සාධක ද වකුගඩු රෝග ව්යාප්තියට බලපා ඇත. වර්තමානයේ 10%ක් ලෙස පවතින මෙම වකුගඩු රෝගී ප්රතිශතය, නිසි වැළැක්වීමේ ක්රියාමාර්ග නොගතහොත් අනාගතයේදී 25% දක්වාත්, ඇතැම් විට 30%ත් 40%ත් අතර අගයකටත් ඉහළ යා හැකි බව වෛද්යවරිය අනතුරු අඟවයි.
කොළඹ අවට ප්රදේශ කිහිපයක තරුණ තරුණියන් අතර සිදුකළ අධ්යයනයකදී හෙළි වී ඇත්තේ, ශරීර සුවතාව (bodybuilding) සඳහා භාවිත කරන ඖෂධ වර්ග සහ සම පැහැපත් කර ගැනීමේ (skin whitening) සඳහා භාවිත කරන විවිධ රසායනික ද්රව්ය අඩංගු දේ භාවිත කිරීම ද වකුගඩු රෝගී තත්ත්වයන්ට තුඩු දී ඇති බවයි.
සෞඛ්ය සම්පන්න ජීවන රටාවකට හුරුවීම, දියවැඩියාව සහ රුධිර පීඩනය පාලනය කිරීම මගින් මෙම බරපතළ අවදානම අවම කරගත හැකි බව වෛද්ය විශේෂඥයින් පෙන්වා දෙයි.
