2026 පාපන්දු ලෝක කුසලාන තරගාවලිය නැරඹීම සඳහා අමෙරිකා එක්සත් ජනපදයට පැමිණෙන සංචාරකයන්ට අත්තනෝමතික ලෙස රැඳවුම් භාරයට ගැනීම් හෝ පිටුවහල් කිරීම් වැනි මානව හිමිකම් උල්ලංඝනය කිරීම්වලට මුහුණ දීමට සිදුවිය හැකි බවට ප්රමුඛ පෙළේ මානව හිමිකම් සංවිධාන රැසක් අනතුරු ඇඟවීමක් (Travel Advisory) නිකුත් කර තිබේ.
මෙම නිවේදනය සඳහා ඇමරිකානු සිවිල් නිදහස් සංගමය (ACLU) සහ NAACP ඇතුළු ප්රමුඛ පෙළේ සංවිධාන රැසක් අත්සන් කර ඇත. ට්රම්ප් පරිපාලනය යටතේ ක්රියාත්මක වන දැඩි ආගමන විගමන මර්දනය සහ සුළුතර ජාතීන්ගේ මෙන්ම LGBTQ ප්රජාවගේ අයිතිවාසිකම් සීමා වීම මෙම තත්ත්වයට හේතු වී තිබේ.
අමෙරිකාවට පැමිණෙන ක්රීඩා ලෝලීන්, ක්රීඩකයන් සහ මාධ්යවේදීන් හට ඔවුන්ගේ ජාතිකත්වය හෝ පෙනුම මත පදනම්ව පරීක්ෂාවට ලක්වීම (Racial profiling), විද්යුත් උපකරණ දැඩි පරීක්ෂාවට ලක් කිරීම සහ ආගමන විගමන රැඳවුම් මධ්යස්ථාන තුළදී අමානුෂික සැලකිලිවලට ලක්වීමේ අවදානමක් පවතින බව එම සංවිධාන පවසයි. විශේෂයෙන්ම විදේශිකයන්, සුළුතර ජනවාර්ගිකයන් සහ LGBTQ පුද්ගලයන් වැඩි අවදානමකට ලක්විය හැකි බැවින්, අමෙරිකාව තුළ සංචාරය කිරීමේදී දැඩි විමසිල්ලෙන් පසුවන ලෙසත් හදිසි අවස්ථාවකදී ක්රියාත්මක වීමට පූර්ව සැලසුමක් සකස් කර ගන්නා ලෙසත් ඔවුන් උපදෙස් දෙයි.
ලෝක කුසලාන තරගාවලිය පැවැත්වෙන අමෙරිකාවේ සත්කාරක නගර 11 තුළ මානව හිමිකම් ආරක්ෂා කිරීමට අමෙරිකානු රජයට බලපෑම් කරන ලෙස මානව හිමිකම් ක්රියාකාරීහු ජාත්යන්තර පාපන්දු සම්මේලනයෙන් (FIFA) ඉල්ලා සිටිති.
