ධීවර කර්මාන්තය ආශ්‍රිත අපනයනකරුවන් මුහුණ පා සිටින ගැටළු රැසක් පවතින බවත් ඒවාට යහපත් විසඳුමක් ලබා දීමට රජය සමඟ සාකච්ඡා කොට වැඩපිළිවෙලක් සකස් කරන බව ධීවර අමාත්‍ය ඩග්ලස් දේවානන්දා මහතා පවසයි.
අමාත්‍යවරයා මේ බව පැවසුවේ පසුගිය 19 වන දින ධීවර අමාත්‍යාංශයේ දී ධීවර කර්මාන්ත ආශ්‍රිත අපනයනකරුවන්ගේ සංගමයේ නියෝජිතයන් සමග පැවති සාකච්ඡාවේදීය.
මෙම සාකච්ඡාවට සහභාගී වු අපනයන සංගමයේ නියෝජිතයින් ධීවර කර්මාන්තය ආශ්‍රිත නිශ්පාදන අපනයනය කිරීමේ ක්‍රමවේදය නවීන තාක්ෂණයට අනුව ක්‍රමවත්ව කල යුතු බවත් මෙම ක්ෂේත්‍රයේ දැනට පවතින වැරදි සහගත ක්‍රමවේදයන් නිවැරදි කිරීම සදහා දැඩි පියවරක් ගත යුතු බවත් පෙන්වා දුන්හ.
අපනයන ආදායමෙන් 80% පමණ ලබා ගන්නා ටූනා වර්ගයේ මත්ස්‍යයන් ලෝකයේ පවතින කාලගුණ විපර්යාස හේතුකොට ගෙන වඳ වී යන බවත් එම නිසා ධීවර යාත්‍රාවලින් අල්ලා ගනු ලබන මසුන් ආරක්ෂා සහිතව ගොඩට ගෙන ඒම සදහා ඒවා ගබඩා කිරීම සඳහා කාලෝචිත පියවර ගත යුතු බවද සංගමයේ නියෝජිතයින් අමාත්‍යවරයාට පෙන්වා දුන්හ.
මෙහිදි වැඩිදුරටත් අදහස් දැක් වු අමාත්‍යවරයා ධීවර හා කෘෂිකර්මාන්ත ක්ෂෙත්‍ර පිළිබදව මේ රජය වැඩි අවධානය යොමු කොට එම අංශයන්ගෙන් රට ස්වයංපෝෂිත කොට අපනයනය වැඩි කිරීම සදහා වත්මන් රජය ක්‍රියාකරගෙන යන බවත් එම නිසා අපනයනකරුවන් මුහුණ දෙන අපහසුතාවයන් මග හැරීමට සැලසුම් සකස් කර ඇති බවත් ධීවර ක්ෂේත්‍රය හා සම්බන්ධ අපනයනකරුවන්ගේ සියලු ගැටළු ජනාධිපතිවරයාගේ හා එතුමාගේ උපදේශක හිටපු අමාත්‍ය බැසිල් රාජපක්ෂ මහතා සමග සාකච්ඡා කර විසදීමට අවශ්‍ය පියවර ගන්නා බව ප්‍රකාශ කළේය.
