ප්රසිද්ධ රැස්වීමකදී සිදුකළ අපහාසාත්මක ප්රකාශයක් සම්බන්ධයෙන් රුපියල් මිලියන 500ක වන්දි මුදලක් ඉල්ලා හිටපු විදුලිබල හා බලශක්ති අමාත්ය කුමාර ජයකොඩි මහතා විසින් සමගි ජන බලවේගය පාර්ලිමේන්තු මන්ත්රී ප්රසාද් සිරිවර්ධන මහතා වෙත එන්තරවාසියක් යොමු කර තිබෙනවා. නීතිඥ සම්පත් යාලේවත්ත මහතා මාර්ගයෙන් යොමු කරන ලද මෙම ලිපිය මගින් පෙන්වා දෙන්නේ පසුගිය මාර්තු 22 වනදා පැවති මාධ්ය හමුවකදී මන්ත්රීවරයා විසින් එල්ල කරන ලද මූල්ය අවභාවිත චෝදනා පදනම් විරහිත බවයි. වසර 30කට අධික කාලයක් ඉංජිනේරුවරයෙකු ලෙස කටයුතු කර ඇති ජයකොඩි මහතා සිය වෘත්තීය සහ දේශපාලන ජීවිතය පුරා නිකැළැල් චරිතයක් පවත්වාගෙන ගොස් ඇති බවත්, මෙවැනි ප්රකාශ හරහා ඔහුගේ පෞද්ගලික කීර්ති නාමයට මෙන්ම ඔහු නියෝජනය කරන ජාතික ජන බලවේගයේ ප්රතිරූපයට හානි කිරීමට උත්සාහ කර ඇති බවත් එහි සඳහන් වෙනවා.
විශේෂයෙන්ම ගල් අඟුරු ආනයනය සම්බන්ධයෙන් පත්කළ ජනාධිපති විමර්ශන කොමිෂන් සභාවේ පරීක්ෂණ සඳහා ඉඩ ලබාදෙමින් ඔහු මෑතකදී සිය අමාත්ය ධුරයෙන් ස්වේච්ඡාවෙන් ඉල්ලා අස්වූ බවද නීතිඥවරයා සිහිපත් කර තිබෙනවා. ඒ අනුව මෙම අපහාසය වෙනුවෙන් රුපියල් මිලියන 500ක වන්දියක් දින 14ක් ඇතුළත ගෙවන ලෙස දන්වා ඇති අතර, නියමිත කාලය තුළ එම මුදල නොගෙවන්නේ නම් නෛතික පොලිය සහ නඩු ගාස්තුද සහිතව එය අය කර ගැනීමට අධිකරණ ක්රියාමාර්ග ගන්නා බව එම එන්තරවාසිය මගින් වැඩිදුරටත් අවධාරණය කර තිබෙනවා.
