මැදපෙරදිග කලාපයේ පවතින උණුසුම් වාතාවරණය හමුවේ, වාණිජ නෞකාවල ආරක්ෂාව තහවුරු කිරීම සඳහා ප්රංශ නාවික හමුදාව සෘජුවම මැදිහත් වන බව ජනාධිපති එමානුවෙල් මැක්රොන් අද (අප්රේල් 17) පැරිසියේදී ප්රකාශ කළේය. හෝමුස් සමුද්ර සන්ධිය යළි විවෘත කිරීම සහ නාවික නිදහස සහතික කිරීම සඳහා පැවති ජාත්යන්තර සමුළුවෙන් අනතුරුව ඔහු මේ බව අවධාරණය කළේය.
මෙම මෙහෙයුම සහ ප්රංශයේ යුද ශක්තිය පිළිබඳ නවතම තොරතුරු මෙසේය:
ප්රංශය මේ වන විටත් නැගෙනහිර මධ්යධරණී මුහුදේ සහ රතු මුහුදේ සිය ප්රබලතම නාවික බලඇණියක් ස්ථාපිත කර තිබේ. එහි නායකත්වය දරනු ලබන්නේ ප්රංශයේ එකම න්යෂ්ටික බලයෙන් ක්රියාත්මක වන ප්රහාරක නෞකාව වන “චාල්ස් ඩි ගෝල්” (Charles de Gaulle) නෞකාවයි. මීට අමතරව ප්රංශ නාවික හමුදාව සතු නවීනතම ෆ්රිගේට් (Frigates) නෞකා 8ක්, හෙලිකොප්ටර් ප්රහාරක නෞකා (Amphibious helicopter carriers) 2ක් සහ අමතර ගුවන් බලඇණි ද මෙම මෙහෙයුම සඳහා එක් කර ඇති බව ජනාධිපතිවරයා සඳහන් කළේය.
මෙම මෙහෙයුමේ ප්රධාන අරමුණ වන්නේ ඉරාන යුද්ධය හේතුවෙන් අවහිර වී ඇති හෝමුස් සමුද්ර සන්ධිය හරහා ගමන් කරන වාණිජ නෞකා සඳහා ආරක්ෂිත රැකවල් (Escorts) සැපයීම සහ මුහුදේ ඇති බෝම්බ ඉවත් කිරීමයි. මෙම මෙහෙයුම සම්පූර්ණයෙන්ම “ආරක්ෂාකාරී” (Purely defensive) එකක් වන අතර, එය ඇමෙරිකානු මෙහෙයුම්වලින් ස්වාධීනව, යුරෝපීය සහ අනෙකුත් මිත්ර රටවල සහාය ඇතිව ක්රියාත්මක වේ.
නැගෙනහිර මධ්යධරණී මුහුදේ සයිප්රස් දූපත ආශ්රිතව දැනටමත් “චාල්ස් ඩි ගෝල්” නෞකාව සිය මෙහෙයුම් ආරම්භ කර ඇති බව චන්ද්රිකා ඡායාරූප මගින් තහවුරු වී තිබේ. ලෝක තෙල් සැපයුමෙන් පහෙන් එකක් ගමන් කරන මෙම තීරණාත්මක මුහුදු මාර්ගය යළිත් සාමාන්ය තත්ත්වයට පත් කිරීම සඳහා ප්රංශය ලබා දෙන මෙම නායකත්වය ගෝලීය බලශක්ති වෙළඳපොළට විශාල සහනයක් වනු ඇතැයි අපේක්ෂා කෙරේ.
තොරතුරු උපුටා ගැනීම: Reuters සහ China pulse ඇසුරින්
