ගාල්ල බන්ධනාගාරයේ රඳවා සිටින රැඳවියන් සංඛ්යාව අධික ලෙස ඉහළ යාම හේතුවෙන් එම පිරිස පාලනය කිරීමේදී බන්ධනාගාර කාර්ය මණ්ඩලය දැඩි අර්බුදයකට මුහුණ දී සිටින බව වාර්තා වේ. 300ක පමණ පිරිසක් රඳවා තැබිය හැකි ධාරිතාවයකින් යුත් ගාල්ල බන්ධනාගාරයේ මේ වන විට රැඳවියන් 2050ක් පමණ රඳවා සිටින අතර, ඒ අතර කාන්තා රැඳවියන් 110ක් ද සිටින බව බන්ධනාගාර අධිකාරී කාර්යාලය පෙන්වා දෙයි.
ධාරිතාවය මෙන් හත් ගුණයකට වඩා වැඩි පිරිසක් රඳවා සිටීම හේතුවෙන් රැඳවියන්ට අවශ්ය ජලය, සනීපාරක්ෂක පහසුකම් සහ නවාතැන් සැපයීමේදී බන්ධනාගාර නිලධාරීන් දැඩි අපහසුතාවයට පත්ව ඇත. වසර ගණනාවක සිට දිස්ත්රික් සම්බන්ධීකරණ කමිටු රැස්වීම්වලදී මෙම ගැටලුව සාකච්ඡා වුවද, මේ දක්වා ස්ථිර විසඳුමක් ලැබී නොමැත. මීට පෙර ගාල්ල නගර සංවර්ධන සැලැස්ම යටතේ බන්ධනාගාරය වෙනත් ස්ථානයකට ගෙන ගොස්, වත්මන් ගොඩනැගිල්ල හෝටලයක් බවට පත් කිරීමට ද යෝජනා වී තිබුණි.
මෙම අර්බුදයට විසඳුම් ලෙස බූස්ස ප්රදේශයේ අක්කර හතක ඉඩමක් හඳුනාගෙන ඇති බව ගාල්ල දිස්ත්රික් සම්බන්ධීකරණ කමිටුවේ සභාපති සහ වෘත්තීය අධ්යාපන නියෝජ්ය අමාත්ය නලින් හේවගේ මහතා ප්රකාශ කළේය. අධිකරණ අමාත්යවරයාගේ උපදෙස් පරිදි අමාත්යාංශ ලේකම්වරයා සහ බන්ධනාගාර කොමසාරිස් ජනරාල්වරයා ඉදිරි දින කිහිපය තුළ ගාල්ලේ සංචාරය කරමින් මෙම ගැටලුවට කඩිනම් විසඳුම් ලබා දීමට නියමිත බව ද ඔහු වැඩිදුරටත් සඳහන් කළේය.
