ලෝක වෙළෙඳපොළේ බොරතෙල් මිල ශීඝ්රයෙන් ඉහළ යෑම, නැව් ගාස්තු වැඩි වීම සහ මැදපෙරදිග ගැටුම් හේතුවෙන් පවතින අවිනිශ්චිතතාව නිසා ලොව පුරා ඉන්ධන මිල ශීඝ්රයෙන් ඉහළ යමින් පවතී. යුද ගැටුම් හේතුවෙන් ලෝක වෙළෙඳපොළේ බොරතෙල් බැරලයක මිල ඩොලර් 120 දක්වා ඉහළ ගිය අතර, එය මේ වන විට ඩොලර් 100 – 105 මට්ටමේ පැවතුණද, මැයි මාසය අවසාන වන විට එය යළිත් වේගයෙන් ඉහළ යනු ඇතැයි පුරෝකථනය කර තිබේ.
ලෝකයේ බොහෝ රටවල් ඉන්ධන මිල ඉහළ දැමුවද මේ දක්වා මිල වැඩි නොකළ ඉන්දියාව, වසර 4කට පසු පළමු වරට ඉන්ධන මිල 3%කින් ඉහළ දමා ඇත. ඒ අනුව පෙට්රල් ලීටරයක මිල ඉන්දීය රුපියල් 97.77ක් සහ ඩීසල් ලීටරයක මිල ඉන්දීය රුපියල් 90.67ක් දක්වා ඉහළ ගොස් තිබේ. ඉන්දියාවේ ඉන්ධන පිරවුම්හල්වලින් 90%කට වඩා පාලනය කරන ඉන්දීය ඔයිල්, හින්දුස්තාන් පෙට්රෝලියම් සහ භාරත් පෙට්රෝලියම් යන රාජ්ය සමාගම් විසින් මෙම නව මිල තීරණය කර ඇත. ඉහළ යන බලශක්ති වියදම් හමුවේ විදේශ සංචිත රැක ගැනීම වෙනුවෙන් ඉන්ධන භාවිතය අවම කරන ලෙසත්, හැකි සෑම අවස්ථාවකදීම නිවසේ සිට රාජකාරි කරන ලෙසත් ඉන්දීය අගමැති නරේන්ද්ර මෝදි ජනතාවගෙන් ඉල්ලා තිබේ.
පාකිස්තානයේ ඉන්ධන මිල ඉහළම අගයක් දක්වා වැඩි කර ඇති අතර, එරට ඩීසල් ලීටරයක මිල පාකිස්තානු රුපියල් 414.58ක් සහ පෙට්රල් ලීටරයක මිල පාකිස්තානු රුපියල් 414.78ක් දක්වා ඉහළ දමා ඇත. පසුගිය මාස 3ක කාලය තුළ පාකිස්තානයේ ඉන්ධන වියදම් 56% සිට 75% දක්වා ඉහළ ගොස් ඇති බව එරට මාධ්ය වාර්තා කරයි.
වියට්නාමය, ජර්මනිය සහ එක්සත් ජනපදය වැනි රටවල් ද 2026 අප්රේල් මාසයේදී සිය රටවල ඉන්ධන මිල 16% සිට 50% දක්වා ඉහළ අගයකින් වැඩි කිරීමට පියවර ගෙන තිබුණි.
