ලෝක ජනගහන වර්ධනය, තරබාරුකම සහ රුධිරයේ සීනි මට්ටම ඉහළ යාම හේතුවෙන් 2050 වසර වන විට ලොව පුරා බිලියන 1.8ක ජනතාවකට පරිවෘත්තීය අක්මා රෝග වැළඳිය හැකි බව නවතම පර්යේෂණ වාර්තාවක් පෙන්වා දෙයි. මින් පෙර “මත්පැන් නොවන මේද අක්මා රෝගය” (NAFLD) ලෙස හැඳින්වුණු, වර්තමානයේ MASLD ලෙස හඳුන්වන මෙම රෝගී තත්ත්වය දැනටමත් ලොව පුරා පුද්ගලයන් හය දෙනෙකුගෙන් එක් අයෙකුට වැළඳී ඇති බවත්, පසුගිය දශක තුන තුළ රෝගීන් සංඛ්යාව සියයට 143කින් ඉහළ ගොස් ඇති බවත් ‘Lancet Gastroenterology & Hepatology’ සඟරාවේ පළ වූ මෙම වාර්තාවේ සඳහන් වේ.
පර්යේෂණයට අනුව 1990 වසරේදී මිලියන 500ක්ව පැවති රෝගීන් සංඛ්යාව 2023 වන විට බිලියන 1.3 දක්වා වර්ධනය වී ඇති අතර, එය 2050 වන විට තවත් සියයට 42කින් ඉහළ යනු ඇතැයි ගණන් බලා ඇත. විශේෂයෙන්ම මැදපෙරදිග සහ උතුරු අප්රිකානු කලාපවල මෙම රෝගයේ ව්යාප්තිය ඉහළ මට්ටමක පවතින අතර, බටහිර යුරෝපයේ වැඩිම වර්ධනයක් පෙන්නුම් කර ඇත්තේ එක්සත් රාජධානියයි. රුධිරයේ සීනි මට්ටම ඉහළ යාම මෙයට ප්රධානතම හේතුව ලෙස හඳුනාගෙන ඇති අතර, අධික ශරීර බර (High BMI) සහ දුම්පානය ද මෙයට සෘජුවම දායක වේ.
මෙම රෝගය බොහෝ විට මුල් අවධියේදී කිසිදු රෝග ලක්ෂණයක් නොපෙන්වන බැවින් බොහෝ දෙනෙකු තමන්ට රෝගය වැළඳී ඇති බව නොදන්නා බව බ්රිතාන්ය ජාතික සෞඛ්ය සේවය (NHS) පවසයි. අධික විඩාව, සාමාන්ය අසනීප ගතිය සහ බඩේ දකුණු පස ඉළ ඇටවලට පහළින් ඇති වන වේදනාව මෙහි ලක්ෂණ විය හැකිය. ජීවන රටාවේ වෙනස්කම් සහ සෞඛ්ය සම්පන්න ආහාර රටාවක් මඟින් මෙය පාලනය කළ හැකි වුවද, නිසි අවධානයක් යොමු නොකළහොත් අනාගතයේදී අක්මාව අකර්මණ්ය වීම (Cirrhosis) හෝ පිළිකා තත්ත්වයන් දක්වා මෙය වර්ධනය විය හැකි බැවින් මෙය ගෝලීය සෞඛ්ය ප්රමුඛතාවයක් ලෙස සැලකිය යුතු බව පර්යේෂකයෝ අවධාරණය කරති.
