මැදපෙරදිග බලශක්ති මධ්‍යස්ථාන සහ නාවික මාර්ග ඉලක්ක කර ගනිමින් ප්‍රහාර තීව්‍ර වීමත් සමඟ ලෝක වෙළෙඳපොළේ බොරතෙල් මිල කැපී පෙනෙන ලෙස ඉහළ ගොස් තිබේ. ගෝලීය බලශක්ති සැපයුමට බාධා ඇතිවීමේ අවදානම මෙම මිල ඉහළ යාමට බලපා ඇති බව වාර්තා වේ.
2026 ඔක්තෝබර් 24 වනදා වාර්තා වූ දත්ත අනුව, ජාත්‍යන්තර මිණුම් දණ්ඩ වන බ්‍රෙන්ට් බොරතෙල් බැරලයක මිල ඩොලර් 3.55කින් හෙවත් 3.14%කින් ඉහළ ගොස් ඩොලර් 116.72ක් ලෙස සටහන් වී තිබේ. එය අප්‍රේල් 29 වැනිදායින් පසු වාර්තා වූ ඉහළම මිල බව සඳහන් වේ. ඇමරිකානු WTI බොරතෙල් බැරලයක මිලද ඩොලර් 3.80කින් ඉහළ ගොස් ඩොලර් 103.27ක් වී ඇති අතර, සතියක් තුළ බ්‍රෙන්ට් මිල 6%කින් ඉහළ ගොස් තිබේ.
යේමනයේ ඉරාන හිතවාදී හූති සටන්කාමීන් සෞදි අරාබියේ බලශක්ති මධ්‍යස්ථාන වෙත ඩ්‍රෝන සහ මිසයිල ප්‍රහාර එල්ල කිරීමත් සමඟ වෙළෙඳපොළ තුළ සැපයුම් පිළිබඳ අවිනිශ්චිතතාව ඉහළ ගොස් ඇත. ආරක්ෂක තත්ත්වය හේතුවෙන් සෞදි ඇරම්කෝ සමාගම ධහ්රාන්හි පිහිටි සිය ප්‍රධාන මූලස්ථානයෙන් සේවකයන් ඉවත් කිරීමට පියවර ගෙන ඇති බව රොයිටර්ස් වාර්තා කරයි.
එමෙන්ම, එක්සත් අරාබි එමීර් රාජ්‍යයේ උම් අල්-කුවේන් වෙරළට ඔබ්බෙන් නෞකාවක තෙල් කාන්දුවක් වාර්තා වීම සහ හෝමූස් සමුද්‍ර සන්ධිය ආශ්‍රිත ප්‍රහාර ඉහළ යාමද අර්බුදය තීව්‍ර කර තිබේ. හෝමූස් සහ බබ් එල්-මන්ඩෙබ් මුහුදු මාර්ගවල වාණිජ නෞකාවලට එල්ල වූ ප්‍රහාර හේතුවෙන් තෙල් ප්‍රවාහනයට බාධා ඇතිවීමේ අවදානමක් පවතින බව වෙළෙඳපොළ විශ්ලේෂකයෝ පෙන්වා දෙති.
මිල ඉහළ යාම පාලනය කිරීමේ අරමුණින් ඇමරිකාව සිය උපායමාර්ගික ඛනිජ තෙල් සංචිතයෙන් බොරතෙල් බැරල් 400,000ක් මුදා හැරීමට පියවර ගෙන ඇති බව වාර්තා වේ. එහෙත් එරට සංචිත 1982න් පසු අවම මට්ටමක පවතින බවද සඳහන් වේ. G7 එකඟතාව යටතේ ජර්මනියද සිය සංචිත විවෘත කර ඇති අතර, රුසියානු ඩීසල් තොග නිව්යෝර්ක් වෙත ගෙන්වා ගැනීමට ඇමරිකානු පරිපාලනය එකඟ වී ඇති බව වාර්තා වේ.
මේ අතර, ලිබියාවේ ප්‍රධාන තෙල් නළ පද්ධතියක් වසා දැමීම සහ ඇමරිකාවේ තෙල් කැණීම් යන්ත්‍ර සංඛ්‍යාව 603ක් දක්වා සීමා වීමද සැපයුම් සම්බන්ධ ගැටලු තවත් උග්‍ර කර තිබේ. හෝමූස් සමුද්‍ර සන්ධිය හරහා තෙල් ප්‍රවාහනය අඩාල වුවහොත් ලෝක වෙළෙඳපොළේ මිල තවදුරටත් ඉහළ යා හැකි බවට විශ්ලේෂකයෝ අනතුරු අඟවති.
