කොළඹ විහාරමහාදේවි උද්‍යානයේ සත්‍යග්‍රහයේ නිරත භික්ෂූන් වහන්සේලා සහ කොළඹ නගර සභාවේ නිලධාරීන් අතර උණුසුම් තත්ත්වයක් හටගෙන තිබේ.
ඒ, සත්‍යග්‍රහ භූමියේ සවිකර තිබූ බෞද්ධ කොඩි සහ පුවරු ඉවත් කිරීමට නගර සභා නිලධාරීන් උත්සාහ කිරීමත් සමඟය.
එහිදී උද්‍යානය භාර නිලධාරීන් සත්‍යග්‍රහයේ නිරත භික්ෂූන් වහන්සේලාට දැනුම්දී ඇත්තේ අදාළ කොඩි සහ පුවරු ඉවත් කරගන්නා ලෙස හෝ ඒ සඳහා මුදල් ගෙවන ලෙසයි. එසේ නොවන්නේ නම් ඒවා ඉවත් කිරීමට සිදුවන බවද නිලධාරීන් පවසා තිබේ.
එම දැනුම්දීමට සත්‍යග්‍රහයේ නිරත භික්ෂූන් වහන්සේලා විරෝධය පළ කිරීමත් සමඟ දෙපාර්ශ්වය අතර මත ගැටුමක් ඇති වී තිබේ.
කෙසේ වෙතත්, උද්‍යාන භාර නිලධාරීන් එහි සවිකර තිබූ බැනර් කිහිපයක් ගලවා ඉවත් කිරීමට පියවර ගෙන ඇති අතර, එම ස්ථානයේ සිටි භික්ෂූන් වහන්සේලා සහ ගිහි පිරිස් ඒවා යළි සවිකර තිබේ.
