ඉදිරි මහ කන්නයේදී ගොවි ජනතාවට කිසිදු හිඟයකින් තොරව, නියමිත වේලාවට පොහොර ලබා දීම සහතික කිරීම සඳහා පොහොර ආනයනය සහ බෙදා හැරීමේ සමස්ත ක්රියාවලිය නිශ්චිත කාලසටහනකට අනුව සිදු කිරීමට රජය සහ පෞද්ගලික පොහොර සමාගම් එකඟතාවකට පැමිණ ඇත.
ජනාධිපති ලේකම් ආචාර්ය නන්දික සනත් කුමානායක සහ කෘෂිකර්ම නියෝජ්ය අමාත්ය නාමල් කරුණාරත්න යන මහත්වරුන්ගේ ප්රධානත්වයෙන් ජනාධිපති කාර්යාලයේදී පැවැති විශේෂ සාකච්ඡාවකදී මේ පිළිබඳව පුළුල් ලෙස අවධානය යොමු කෙරිණි. එහිදී වත්මන් යල කන්නයේ පොහොර බෙදා හැරීමේ තත්ත්වය ද සමාලෝචනයට ලක් විය.
ලබන සැප්තැම්බර් මාසයේ මුලදී මහ කන්නය ආරම්භ වීමට නියමිත බැවින්, ඊට පෙර ගොවීන් වෙත පොහොර ළඟා කරවීමේ වැදගත්කම මෙහිදී අවධාරණය කෙරිණි. ලෝක වෙළෙඳපොළේ පොහොර මිල උච්චාවචනය වීමේ ප්රවණතා පිළිබඳව ද අවධානය යොමු කරමින් ක්රමවත් ආනයන සැලැස්මක් සකස් කිරීමට මෙහිදී තීරණය වූ අතර, එහි ප්රගතිය එළඹෙන ජූලි මාසයේ මුල් භාගයේදී නැවත විමසා බැලීමට සියලු පාර්ශ්ව එකඟ වී තිබේ. පොහොර සමාගම්වලට මේ සඳහා රජයෙන් ලැබිය යුතු සහයෝගය පිළිබඳව ද ජනාධිපති ලේකම්වරයා මෙහිදී විමසා බැලීය.
මෙම සාකච්ඡාව සඳහා ජනාධිපති ජ්යෙෂ්ඨ අතිරේක ලේකම් කපිල ජනක බණ්ඩාර, කෘෂිකර්ම අමාත්යාංශයේ අතිරේක ලේකම් ජානකී අමරතුංග, රාජ්ය පොහොර සමාගමේ සභාපති බී.සී.ඩබ්. සේතුගේ යන මහත්ම මහත්මීන් ද, CIC, හේලීස්, ඇලයිඩ් සහ නිව් ලංකා කොමර්ෂල් ඇතුළු ප්රමුඛ පෙළේ පෞද්ගලික පොහොර සමාගම්වල ප්රධාන විධායක නිලධාරීන් සහ අධ්යක්ෂවරුන් පිරිසක් ද එක්ව සිටියහ.
