පළාත් සභා මැතිවරණය පැවැත්වීමට වත්මන් රජය මැලිකමක් දක්වන්නේ මැතිවරණ ප්රතිඵල හමුවේ ජනතා විරෝධය සහ ඡන්ද පදනම අහිමි වීම පිළිබඳව පවතින බිය නිසා බව විපක්ෂ නායක සජිත් ප්රේමදාස මහතා පවසයි. හිටපු පළාත් සභා මන්ත්රීවරුන් සමඟ විපක්ෂ නායක කාර්යාලයේ පැවති හමුවකදී ඒ මහතා මෙම අදහස් පළ කළේය.
විපක්ෂ නායකවරයා පෙන්වා දුන්නේ මෑතකදී පැවති මැතිවරණවලදී රජයට ඡන්ද ලක්ෂ 23ක් පමණ අහිමි වී ඇති බවත්, තවදුරටත් ඡන්ද අහිමි වේ යැයි පවතින බිය නිසා ජනමතයට මුහුණ දීමට රජය අසමත් වී ඇති බවත්ය. ඕනෑම පාර්ශ්වයකට අසීමිත බලයක් ලැබීම රටට හානිකර බවත්, තමන් නියෝජනය කරන සමගි ජන බලවේගය වුවද අපේක්ෂා කරන්නේ සාධාරණ බහුතරයක් පමණක් බවත් ඔහු වැඩිදුරටත් ප්රකාශ කළේය.
රජය බලයට පැමිණි පසු ජන දුක අමතක කර සුර සැප විඳින බව පවසන විපක්ෂ නායකවරයා, ඉන්ධන සහ විදුලි බිල්පත් සම්බන්ධයෙන් සහන ලබා දීමට පියවර නොගැනීම පිළිබඳව රජය දැඩි ලෙස විවේචනය කළේය. පළාත් සභා මැතිවරණය පැවැත්වීමට රජයට බලකිරීම සඳහා විශේෂ ජාතික මෙහෙයුම් කමිටුවක් පිහිටුවන බවත්, එහිදී තනතුරු පදනම් කර නොගෙන සියලු දෙනා එක්වන බවත් ඔහු පැවසීය.
13 වැනි සංශෝධනය පිළිබඳ අදහස් දක්වමින් විපක්ෂ නායකවරයා සඳහන් කළේ සමගි ජන බලවේගය ඒ සම්බන්ධයෙන් ද්විත්ව ප්රතිපත්තියක් අනුගමනය නොකරන බවයි. රටේ ඒකීයභාවය සහ ස්වෛරීත්වය ආරක්ෂා කරමින් එය පවතින ආකාරයෙන්ම ක්රියාත්මක කිරීමට පක්ෂයක් ලෙස තමන් සූදානම් බව ඔහු අවධාරණය කළේය. තවද, පළාත් සභා යනු සුදු අලීන් නොවන බවත්, නිසි ලෙස ක්රියාත්මක කළහොත් ඒවා තුළින් රටට දැවැන්ත මෙහෙවරක් සහ ආයෝජන අවස්ථා ලබා ගත හැකි බවත් ඔහු වැඩිදුරටත් පැවසීය.
