දශක ගණනාවක පශ්චාත් යුද වාතාවරණය හමුවේ යටිතල පහසුකම් අවම වී, ක්රීඩා ක්ෂේත්රයෙන් අතහැර දමා තිබූ මුලතිව් දිස්ත්රික්කයේ තෝරාගත් ප්රධාන ක්රීඩාංගණ තුනක් (03) ප්රතිසංස්කරණය කර, ජාතික මට්ටමට නංවාලීමේ ව්යාපෘතිය අද (11) නිල වශයෙන් ආරම්භ කෙරිණි.
තරුණ කටයුතු හා ක්රීඩා අමාත්ය සුනිල් කුමාර ගමගේ මහතා සහ වන්නි දිස්ත්රික් පාර්ලිමේන්තු මන්ත්රී වෛද්ය සෙල්ලතම්බි තිලකනාදන් මහතාගේ ප්රධානත්වයෙන් මුලතිව්හිදී මෙම සංවර්ධන ව්යාපෘති සඳහා මුල්ගල් තැබීම සිදු විය.
මෙම ව්යාපෘතිය හරහා මුලතිව් දිස්ත්රික්කයේ ක්රීඩා පිටි ධාවන පථ, මලල ක්රීඩා සහ අනෙකුත් අත්යවශ්ය නවීන පහසුකම්වලින් සමන්විත වන පරිදි සංවර්ධනය කෙරේ. මින් පෙර පුහුණු පහසුකම් නොමැතිකම හේතුවෙන් ජාතික තලයට පැමිණීමට නොහැකි වූ උතුරේ දක්ෂතා පූර්ණ ක්රීඩක ක්රීඩිකාවන්ට සිය දක්ෂතා ඔප් නැංවීමට මින් මාවත විවර වනු ඇත.
මෙම අවස්ථාවේදී අදහස් දැක්වූ තරුණ කටයුතු සහ ක්රීඩා අමාත්ය සුනිල් කුමාර ගමගේ මහතා සඳහන් කළේ, “පොහොසත් රටක් – ලස්සන ජීවිතයක්” යන සංකල්පය යටතේ උතුරටත් දකුණටත් එක ලෙස යහපත් අනාගතයක් නිර්මාණය කර දිය යුතු බවයි. ක්රීඩා සංවර්ධනය කොළඹට හෝ ප්රධාන නගර කිහිපයකට පමණක් සීමා කළ පැරණි ක්රමය වෙනස් කරමින්, භූගෝලීය දුෂ්කරතා නොසලකා රටේ සෑම දිස්ත්රික්කයකම සිටින දක්ෂ ක්රීඩක ක්රීඩිකාවන්ට ජාත්යන්තර මට්ටමේ පහසුකම් ලබාදීමට රජය බැඳී සිටින බව ද අමාත්යවරයා අවධාරණය කළේය.
වන්නි දිස්ත්රික් පාර්ලිමේන්තු මන්ත්රී වෛද්ය සෙල්ලතම්බි තිලකනාදන් මහතා ප්රකාශ කළේ, දශක ගණනාවකට පසු මුලතිව් තරුණ ප්රජාව වෙනුවෙන් ක්රියාත්මක වන විශාලතම ක්රීඩා යටිතල පහසුකම් සංවර්ධනය මෙය වන බවයි. මෙම ව්යාපෘතිය තුළින් තරුණ පරපුර තුළ විනය, නිරෝගීභාවය සහ ජාතික සමගිය තහවුරු වනු ඇති බව ද ඔහු පැවසීය.
මෙම සමාරම්භක අවස්ථාව සඳහා ක්රීඩා අමාත්යාංශයේ උසස් නිලධාරීන්, ප්රාදේශීය දේශපාලන නියෝජිතයින්, දිස්ත්රික් ක්රීඩා නිලධාරීන් සහ පාසල් දරුවන් විශාල පිරිසක් සහභාගී වූහ.
