අධ්යාපන අමාත්යවරිය ද වන අග්රාමාත්ය ආචාර්ය හරිනි අමරසූරිය මහත්මිය පවසන්නේ, සියලු දරුවන් සඳහා සමාන අවස්ථා සහිත අධ්යාපන ක්රමයක් නිර්මාණය කිරීමේ තීරණ නිවැරදි දත්ත කළමනාකරණය මත පදනම් විය යුතු බවයි. ඇය මේ බව සඳහන් කළේ පසුගිය සිකුරාදා අරලියගහ මන්දිරයේදී පැවැති ජාතික අධ්යාපන කළමනාකරණ තොරතුරු පද්ධතියේ (NEMIS) මානව සම්පත් මොඩියුලයේ පළමු අදියර සහ “ඊ-තක්සලාව” ඉගෙනුම් කළමනාකරණ පද්ධතියේ (LMS) නියමු ව්යාපෘතිය නිල වශයෙන් දියත් කිරීමේ අවස්ථාවට එක්වෙමින්ය.
සෑම දරුවෙකුටම උසස් තත්ත්වයේ අධ්යාපනයක් සඳහා සමාන ප්රවේශයක් තිබිය යුතු බව අවධාරණය කළ අග්රාමාත්යවරිය, එම ඉලක්කය සපුරා ගැනීම සඳහා නිවැරදි දත්ත, ශක්තිමත් ප්රතිපත්ති සහ තාක්ෂණය අත්යවශ්ය බව පැවසුවාය. අධ්යාපන ක්ෂේත්රයේ මානව සම්පත් කළමනාකරණය සහ පරිපාලන කාර්යක්ෂමතාව ඉහළ නැංවීම සඳහා නව NEMIS වේදිකාව නිර්මාණය කර ඇති අතර, එය මගින් ජාතික සහ පළාත් පාසල්වල දත්ත තනි ජාලයකට ඒකාබද්ධ කරනු ඇත.
මෙම ව්යාපෘතියේ පළමු අදියර යටතේ සබරගමුව, බස්නාහිර, දකුණු සහ වයඹ පළාත්වල ගුරු ස්ථාන මාරු ක්රියාවලීන් පද්ධතිය හරහා කළමනාකරණය කෙරෙන අතර, අනාගතයේදී එය දිවයින පුරා සහ සියලුම අධ්යාපන කාර්ය මණ්ඩල ආවරණය වන පරිදි පුළුල් කිරීමට සැලසුම් කර ඇත. ගුරු බඳවා ගැනීම්, ස්ථාන මාරු සහ උසස්වීම්වල විනිවිදභාවය සහ කාර්යක්ෂමතාව ඉහළ නැංවීමට ද මෙමගින් අපේක්ෂා කෙරේ.
ඩිජිටල්කරණය විනිවිද පෙනෙන රාජ්ය සේවාවක් සැපයීම සඳහා අත්යවශ්ය වුවද, තාක්ෂණය ගුරුවරුන් වෙනුවට ආදේශකයක් නොව ඔවුන්ගේ කාර්යභාරය ශක්තිමත් කරන මෙවලමක් බව ද ආචාර්ය අමරසූරිය පෙන්වා දුන්නාය. “ඊ-තක්සලාව” LMS පද්ධතිය මගින් ඉගැන්වීම්, ඉගෙනුම් සහ ඇගයීම් ක්රියාවලීන් සඳහා සහය ලබා දෙන අතරම, අඩු පහසුකම් සහිත පාසල්වල සිසුන්ට ගුණාත්මක අධ්යාපනයක් ලබා ගැනීමට සහ විශේෂ අවශ්යතා සහිත දරුවන් සඳහා අවස්ථා පුළුල් කිරීමට ද උපකාරී වනු ඇත.
අග්රාමාත්ය කාර්යාලය, අධ්යාපන අමාත්යාංශය, ඩිජිටල් ආර්ථික අමාත්යාංශය, අධ්යාපන ඩිජිටල් පරිවර්තන කාර්ය සාධක බලකාය, පළාත් අධ්යාපන බලධාරීන් සහ ශ්රී ලංකා ගුවන් හමුදාව යන ආයතනවල සහයෝගයෙන් මෙම ව්යාපෘතිය ක්රියාත්මක කර තිබේ.
