කෘත්රිම බුද්ධිය (AI) සෞඛ්ය ක්ෂේත්රය ගෝලීය වශයෙන් වේගවත් පරිවර්තනයකට ලක් කරමින් සිටින පසුබිමක, එහි සාර්ථකත්වය සම්පූර්ණයෙන්ම රඳා පවතිනුයේ ශක්තිමත් පාලන පද්ධතියක්, මහජන විශ්වාසය, සදාචාරාත්මක අධීක්ෂණය සහ නිසි නීතිමය රාමුවක් මත යැයි සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා පැවසීය.ස්විට්සර්ලන්තයේ ජිනීවා හි පැවැත්වෙන ලෝක සෞඛ්ය සංවිධානයේ (WHO) 79වන ලෝක සෞඛ්ය සමුළුවට සමගාමීව පැවැත්වුණු “සෞඛ්ය ක්ෂේත්රයේ කෘත්රිම බුද්ධිය, සදාචාරාත්මක අධීක්ෂණය, නීති, පර්යේෂණ හා සමානාත්මතාව” පිළිබඳ විශේෂ සැසිවාරයට එක්වෙමින් අමාත්යවරයා මේ බව සඳහන් කළේය. පසුගිය මැයි 16වන දින ආරම්භ වූ මෙම සමුළුව හෙට (23) දක්වා පැවැත්වෙන අතර, ඒ සඳහා රටවල් 194ක් නියෝජනය කරමින් සෞඛ්ය අමාත්යවරුන් සහ රාජ්ය තාන්ත්රික නිලධාරීන් ඇතුළු විශාල පිරිසක් සහභාගී වී සිටිති.
ශ්රී ලංකාව තුළ සෞඛ්ය ක්ෂේත්රයේ AI භාවිතය නියාමනය කිරීම සඳහා සුදුසු නීතිමය රාමුවක අවශ්යතාව හඳුනාගෙන ඇති අතර, පුද්ගල දත්ත ආරක්ෂණ පනත (Personal Data Protection Act) හඳුන්වා දෙමින් ආරක්ෂණ අධිකාරියක් පිහිටුවීමට මේ වන විටත් පියවර ගෙන තිබේ. රෝග විනිශ්චය, සායනික තීරණ ගැනීම සහ රෝගී තත්ත්වයන් නිරීක්ෂණය කිරීම සඳහා බලපාන AI මෙවලම් වෛද්ය උපකරණ ලෙස ලියාපදිංචි කිරීම, ඇගයීම සහ පශ්චාත් වෙළඳපොළ අධීක්ෂණ යාන්ත්රණය තවදුරටත් ශක්තිමත් කළ යුතුය.
ඩිජිටල් සෞඛ්ය පද්ධති සංවර්ධනය කිරීමේදී දත්ත රහස්යභාවය, සයිබර් ආරක්ෂණය සහ වගවීම සහතික කෙරෙන දත්ත පාලන රාමුවක් නිර්මාණය කිරීම අත්යවශ්ය වන අතර, එම සදාචාරාත්මක ආරක්ෂණ ක්රමවේදයන් තාක්ෂණික නිර්මාණයේ මුල් අදියරේ සිටම ඇතුළත් විය යුතුය. ගෝලීය වශයෙන් සංවර්ධනය කෙරෙන AI විසඳුම් දේශීයකරණයකින් තොරව ඍජුවම භාවිතා කිරීම සෞඛ්ය ක්ෂේත්රයේ අසමානතා තවදුරටත් පුළුල් කිරීමට හේතු විය හැකි බැවින්, මෙම තාක්ෂණයන් මෙරට රෝග ව්යාප්තිය, සෞඛ්ය සේවා කාර්ය ප්රවාහයන්, භාෂාව සහ සමාජීය යථාර්ථයන්ට ගැළපෙන සේ අනුවර්තනය කිරීම අත්යවශ්ය වේ.
