වත්මන් රජයේ මුල් වසර පහ තුළ (2025–2029) මෙරට හෙද සේවාව සඳහා 13,600ක නවකයන් බඳවා ගැනීමට කටයුතු යොදා ඇති බව සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා පවසයි. දැනටමත් එම ඉලක්කයෙන් 30%ක් සම්පූර්ණ වී ඇති අතර, ලබන ඔක්තෝබර් මාසයේ ලබා දීමට නියමිත පත්වීම් 2,867ත් සමඟ එම ප්රතිශතය 50%ක් දක්වා ඉහළ යන බව අමාත්යවරයා සඳහන් කළේය.
නිදහස් සෞඛ්ය සේවාවේ ගුණාත්මකභාවය සහ කාර්යක්ෂමතාව ඉහළ නැංවීමේ අරමුණින්, විද්යාවේදී හෙද (BSc Nursing) උපාධිධාරීන් 515 දෙනෙකු III ශ්රේණියේ හෙද නිලධාරීන් ලෙස පත් කිරීමේ උත්සවයට එක්වෙමින් අමාත්යවරයා මේ බව හෙළි කළේය. කොළඹ පදනම් ආයතනයේදී පැවති මෙම උත්සවයේදී අදහස් දැක්වූ අමාත්යවරයා වැඩිදුරටත් කියා සිටියේ, මෑත කාලයේ වැඩිම හෙද නිලධාරීන් පිරිසක් බඳවා ගත් වසර ලෙස පසුගිය වසර සනිටුහන් වන බවයි. ඒ අනුව 3,441 දෙනෙකු පසුගිය වසරේදීත්, නවකයන් 515 දෙනෙකු සමඟ ගෙවුණු වසරක කාලය තුළ සේවාවට එකතු වූ පිරිස 3,956ක් බවත් ඒ මහතා පෙන්වා දුන්නේය.
එළැඹෙන ඔක්තෝබර් මාසයේ ලබා දෙන පත්වීම් සමඟ 2025 සහ 2026 වර්ෂවලදී පමණක් අලුතින් හෙද සේවාවට එක්වන පිරිස 6,823ක් වේ. මීට අමතරව 2028 වර්ෂයේදී 1,949ක කණ්ඩායමක් සහ 2029 වර්ෂයේ මැද භාගයේදී 2,920ක කණ්ඩායමක් ලෙස පත්වීම් ලබා දීමට නියමිත බවද හෙතෙම පැවසීය. 2021 වර්ෂයෙන් පසුව වසර පහකට පසු විද්යාවේදී හෙද උපාධිධාරීන් III ශ්රේණියේ තනතුරු සඳහා බඳවා ගැනීම සිදුවීම සුවිශේෂී කරුණක් බවද අමාත්යාංශය පෙන්වා දෙයි.
Post Views: 2
