මහනුවර, නුවරඑළිය සහ රත්නපුර යන දිස්ත්රික්කවලට ඇදහැලුණු අධික වර්ෂාපතනය හේතුවෙන් ජාතික ජල සම්පාදන හා ජලාපවහන මණ්ඩලය සතු ජල පිරිපහදු මධ්යස්ථාන කිහිපයක කටයුතු තාවකාලිකව අත්හිටුවීමට සිදුවූ බව එම මණ්ඩලයේ සභාපති චන්දන බණ්ඩාර මහතා පවසයි.
පේරාදෙණියේ පිහිටි මීවතුර ජල පිරිපහදු මධ්යස්ථානයේ ඉලෙක්ට්රොනික පද්ධතිය දක්වා ජලය පැමිණීම නිසා ඊයේ (03) පස්වරුවේ එහි කටයුතු නවත්වා දැමීමට සිදුවූ අතර, එමගින් පවුල් 40,000කට පමණ බලපෑම් එල්ල විය. කෙසේ වෙතත්, මහවැලි ගඟේ ජල මට්ටම පහළ යාමත් සමඟ මේ වන විට මීවතුර ජල පිරිපහදු මධ්යස්ථානය සම්පූර්ණයෙන්ම යථා තත්ත්වයට පත් කර ඇත. මීට අමතරව, මා ඔයේ ජල මට්ටම ඉහළ යාම නිසා මාවනැල්ල සහ අසුපිනිඇල්ල ජල පිරිපහදු මධ්යස්ථාන දෙකට ද බලපෑම් එල්ල වූ අතර, ඉන් මාවනැල්ල පිරිපහදු මධ්යස්ථානය මේ වන විට යථා තත්ත්වයට පත් කර ජල සැපයුම ක්රියාත්මක කර ඇතත්, අසුපිනිඇල්ල මධ්යස්ථානය තවමත් අකර්මන්ය තත්ත්වයේ පවතී. මෙම තත්ත්වය නිසා කෑගල්ල දිස්ත්රික්කය තුළ ජල සබඳතා 40,000කට ආසන්න සංඛ්යාවකට බලපෑම් එල්ල වී තිබේ.
මෙම ගංවතුර තත්ත්වයේ බලපෑම එල්ල වී ඇත්තේ මහනුවර සහ කෑගල්ල දිස්ත්රික්කවලට පමණක් වන අතර, බස්නාහිර පළාතට කිසිදු බලපෑමක් සිදුව නොමැත. ගංගාවල ජලයේ මඩ සහ බොර ගතිය වැඩි වී තිබුණ ද, පිරිපහදු මධ්යස්ථාන තුළ නිසි පරිදි පිරිපහදු කිරීමෙන් අනතුරුව ජලය බෙදා හරින බැවින්, එම ජලය පරිභෝජනය කිරීම සම්බන්ධයෙන් කිසිදු සැකයක් හෝ බියක් ඇති කර නොගන්නා ලෙස ජාතික ජල සම්පාදන හා ජලාපවහන මණ්ඩලය මහජනතාවගෙන් ඉල්ලා සිටී.
