ක්ෂණික මුදල් හුවමාරු ක්රමවේද (Easy Cash/M Cash) ඔස්සේ මහා පරිමාණයෙන් මත්ද්රව්ය ජාවාරම් සිදුකරමින් උපයාගත් කෝටි ගණනක නීති විරෝධී වත්කම් සහ දේපළ රැසක් තහනම් කිරීමට (ක්රියාවිරහිත කිරීමට) නීතිවිරෝධී වත්කම් විමර්ශන කොට්ඨාසය පියවර ගෙන තිබේ. මුදල් විශුද්ධිකරණය වැළැක්වීමේ පනත යටතේ සිදුකළ දීර්ඝ විමර්ශනයකින් අනතුරුව, මෙම ජාවාරමට සෘජුවම සම්බන්ධ බොරැල්ල ප්රදේශයේ පදිංචි අඹුසැමි යුවළක් ද ඊයේ (20) අතුරුගිරිය, ඔරුවල ප්රදේශයේදී අත්අඩංගුවට ගත් බව පොලිස් මාධ්ය කොට්ඨාසය නිල වශයෙන් නිවේදනය කළේය.
පොලිස් විමර්ශනවලදී හෙළි වී ඇත්තේ බොරැල්ල, බේස්ලයින් මාවතේ, සිරිසර උයන නිවාස සංකීර්ණයේ පදිංචි 37 හැවිරිදි සැකකරු සහ ඔහුගේ 32 හැවිරිදි බිරිඳ විසින් 2017 වසරේ සිට අඛණ්ඩව මෙම මත්ද්රව්ය ජාවාරම මෙහෙයවා ඇති බවයි. ඔවුන් ජාවාරමෙන් උපයන මුදල් සූක්ෂ්ම ලෙස සැකකාරියගේ මවගේ බැංකු ගිණුම් වෙත තැන්පත් කර ඇති අතර, එම කළු සල්ලි යොදවා 2023 වසරේ දෙසැම්බර් මාසයේදී අතුරුගිරිය, කොරතොට ප්රදේශයෙන් රුපියල් ලක්ෂ 300 කට (කෝටි 3කට) ආසන්න මුදලකට පර්චස් 6ක සුඛෝපභෝගී නිවසක් සහ ඉඩමක් මිලදී ගෙන තිබේ.
ඒ අනුව, මුදල් විශුද්ධිකරණය වැළැක්වීමේ පනතේ ප්රතිපාදන ප්රකාරව අදාළ නිවස සහ ඉඩම ඊයේ (20) සිට ක්රියාත්මක වන පරිදි දින 7ක කාලයක් සඳහා විකිණීම හෝ පැවරීම තහනම් කරමින් තාවකාලික වත්කම් තහනම් කිරීමේ නියෝගයක් (Freezing Order) නිකුත් කර ඇත. මීට අමතරව, මෙම යුවළ සහ සැකකාරියගේ මව නමින් පවත්වාගෙන ගිය බැංකු ගිණුම් 6ක් මෙන්ම සැකකරු සතු සුඛෝපභෝගී මෝටර් රථයක් සම්බන්ධයෙන් ද නීතිවිරෝධී වත්කම් විමර්ශන කොට්ඨාසය විසින් වැඩිදුර විමර්ශන පවත්වනු ලබයි.
