ඉබෝලා (Ebola) වෛරස් වසංගත තත්ත්වය ලෝක ව්යාප්ත මට්ටමින් පැතිර යාමේ දැඩි අවදානම සැලකිල්ලට ගනිමින්, ඉන්දියාවේ නව දිල්ලි නුවරදී පැවැත්වීමට නියමිතව තිබූ ඉන්දු – අප්රිකානු සමුළුව දින නියමයක් නොමැතිව කල් දමා ඇති බව විදේශීය මාධ්ය වාර්තා පවසයි. වත්මන් වන විට කොංගෝ ජනරජය (DR Congo) ඇතුළු අප්රිකානු කලාපීය රටවල් කිහිපයක සීඝ්රයෙන් පැතිරී යන ඉබෝලා වෛරස් වසංගත තත්ත්වය හමුවේ බරපතල මහජන සෞඛ්ය හදිසි තත්ත්වයක් (Public Health Emergency) නිර්මාණය වී තිබීම හේතුවෙන්, ඉන්දීය රජය සහ අප්රිකානු සංගමය එක්ව මෙම තීරණය ගෙන තිබේ.
නිල සැලසුම්වලට අනුව මෙම ඉහළ පෙළේ රාජ්ය තාන්ත්රික අප්රිකානු සමුළුව එළඹෙන මැයි 28 වනදා සිට 31 වනදා දක්වා නව දිල්ලි නුවරදී ඉතා උත්කර්ෂවත් අන්දමින් පැවැත්වීමට නියමිතව තිබුණි. එහෙත් රාජ්ය නායකයින් සහ විදේශීය නියෝජිතයින් විශාල පිරිසක් සහභාගී වන මෙවැනි ජාත්යන්තර සමුළුවක් පැවැත්වීම මඟින් වෛරසය තවදුරටත් ව්යාප්ත වීමේ දැඩි අවදානමක් පවතින බැවින්, සෞඛ්යාරක්ෂිත පියවරක් ලෙස සමුළුව තාවකාලිකව අත්හිටුවීමට පියවර ගෙන ඇත. වෛරසය පාලනය කිරීමෙන් පසු සමුළුව පවත්වන නව දිනයන් ඉදිරියේදී ප්රකාශයට පත් කරන බව විදේශ අමාත්යාංශ ආරංචි මාර්ග සඳහන් කරයි.
