වත්මන් රජයේ ඇතැම් ක්රියාකලාපයන් හරහා බුද්ධ ශාසනයට සහ භික්ෂුත්වයට බලපෑම් සහගත තත්ත්වයක් නිර්මාණය වෙමින් පවතින බවත්, ආගම සහ සංස්කෘතිය කෙරෙහි ජනතාව තුළ පවතින විශ්වාසය පළුදු කිරීම භයානක තත්ත්වයක් බවත් හිටපු රාජ්ය අමාත්ය ඉන්දික අනුරුද්ධ මහතා පවසයි. ශ්රී ලංකා පොදුජන පෙරමුණ පක්ෂ මූලස්ථානයේ අද දින (2026.04.28) පැවති ප්රවෘත්ති සාකච්ඡාවකට එක්වෙමින් ඒ මහතා අවධාරණය කළේ මත්ද්රව්ය සම්බන්ධයෙන් භික්ෂූන් වහන්සේලා අත්අඩංගුවට ගැනීමේදී අදාළ පරීක්ෂණ සහ දුරකථන දත්ත විශ්ලේෂණය කිරීම් අතිශය රහසිගතව සිදු කළ යුතු බවයි. සුළු පිරිසකගේ වැරදි උලුප්පා දක්වමින් සමස්ත ශාසනයම අපකීර්තියට පත් කිරීමට කිසිදු පාර්ශ්වයකට ඉඩ නොතැබිය යුතු බව ඔහු වැඩිදුරටත් සඳහන් කළේය.
මුදල් අමාත්යාංශයේ සහ මහ බැංකුවේ සිදුව ඇතැයි පැවසෙන මූල්ය අවභාවිතයන් සහ හැකර් ප්රහාරයන් පිළිබඳව ද අදහස් දැක්වූ හිටපු අමාත්යවරයා, ජනතාව දැඩි බදු බරකින් පීඩා විඳින මෙවන් වකවානුවක භාණ්ඩාගාරයේ මුදල් අවභාවිතා කිරීම බරපතළ වරදක් බව පෙන්වා දුන්නේය. පාර්ලිමේන්තුවේ පවතින 159ක බහුතර බලය භාවිතා කරමින් සංස්කෘතිය සහ මූල්ය පද්ධතිය විනාශ නොකරන ලෙස ඔහු රජයට අනතුරු ඇඟවීය. එමෙන්ම පාස්කු ප්රහාරයේ මහ මොළකරු හෙළි කරන බවට ලබාදුන් පොරොන්දු මෙතෙක් ඉටු වී නොමැති බවත්, ඒ පිළිබඳව කතෝලික ජනතාව තවදුරටත් නොමඟ නොයවන ලෙසත් ඔහු රජයෙන් ඉල්ලා සිටියේය.
දේශපාලන පක්ෂවලට ලැබෙන මුදල් සහ ඒවායේ ගිණුම් විගණනය කිරීම සඳහා මැතිවරණ පනතට සංශෝධනයක් ගෙන එන ලෙස ඉන්දික අනුරුද්ධ මහතා මෙහිදී යෝජනා කළේය. දේශපාලන පක්ෂ වෙත මුදල් ගලා එන ආකාරය සහ ඒවායේ විනිවිදභාවය තහවුරු කිරීම රජයේ වගකීමක් බවත්, 159ක බලයක් සහිත වත්මන් රජය සැබෑ ලෙසම දූෂණයට එරෙහි වන්නේ නම් මෙම පියවර ගත යුතු බවත් ඔහු ප්රකාශ කළේය. ජනතාව රජයේ සෑම ක්රියාවක් දෙසම විමසිල්ලෙන් බලා සිටින බැවින්, ජනතා විශ්වාසය පළුදු වන ආකාරයේ නාඩගම් නැවැත්වීමට රජය වහාම පියවර ගත යුතු බව හිටපු අමාත්යවරයා අවසාන වශයෙන් අවධාරණය කළේය.
