ශ්රී ලංකාවේ සංචාරක ක්ෂේත්රය 2025 වසරේදී මිලියන 2.3ක වාර්තාගත සංචාරක පැමිණීමක් සනිටුහන් කළද, ක්ෂේත්රයේ සාර්ථකත්වය මැනිය යුත්තේ හුදු පැමිණෙන සංඛ්යාව මත නොව ඉන් ලැබෙන ආදායම මත බව ආර්ථික විශ්ලේෂකයෝ පවසති. ශ්රී ලංකා සංචාරක සංවර්ධන අධිකාරියේ නවතම වාර්තාවක් මඟින් පෙන්වා දෙන්නේ වර්තමාන සංචාරක ප්රවණතාවය ඉහළ ආදායම් ලබන බටහිර වෙළඳපොළවල් වෙනුවට, අඩු වැය කිරීම් සහිත ආසියානු කලාපීය වෙළඳපොළවල් මත වැඩි වශයෙන් රඳා පවතින බවයි.
මෙම වාර්තාවට අනුව ඉන්දියාවෙන් වැඩිම සංචාරකයින් පිරිසක් පැමිණෙන නමුත් ඔවුන්ගේ දෛනික වැය කිරීම් මධ්යස්ථ මට්ටමක පවතින අතර බංග්ලාදේශයෙන් පැමිණෙන සංචාරකයින් අවම දෛනික වැය කිරීම් වාර්තා කර ඇත. මීට ප්රතිපක්ෂව බටහිර සහ යුරෝපීය සංචාරකයින් මෙරට වැඩි දිනක් රැඳී සිටිමින් දෛනිකව ඉහළම මුදලක් වැය කරන බව දත්ත මඟින් තහවුරු වේ. තිරසාර ආර්ථික ප්රකෘතියක් සඳහා හුදු සංචාරක හිස්ගෙඩි සංඛ්යාව මැනීම වෙනුවට ඉහළ ආදායම් ලබන වෙළඳපොළවල් සහ පැමිණෙන සංචාරකයින් සංඛ්යාව සමබරව පවත්වා ගන්නා ද්විත්ව උපායමාර්ගයක් අනුගමනය කිරීමේ වැදගත්කම විශේෂඥයින් අවධාරණය කරති.
