බුදුරජාණන් වහන්සේගේ තෙමඟුල සිහි කෙරෙන වෙසක් පුන් පොහෝ දිනය හෙටට (30) යෙදී ඇත. මේ නිමිත්තෙන් වෙසක් කලාප, වෙසක් කූඩු මෙන්ම දන්සල් 15,000කට අධික සංඛ්යාවක් රට පුරා මෙවර පැවැත්වේ.
කොළඹ සහ තදාසන්න නගර ආශ්රිතව තොරණ 30කට අධික සංඛ්යාවක් ඉදිකර ඇති අතර, බොරැල්ල ප්රදේශයේ ඉදිකර ඇති තොරණ කොළඹ නගරයේ උසම තොරණ වනු ඇතැයි අපේක්ෂා කෙරේ. තාක්ෂණය සහ කලාත්මක බව එක්තැන් කරමින් නිමවා ඇති මෙම තොරණේ ඇති සුවිශේෂීම අංගය වන්නේ තොරණ මධ්යයේ ඉදිරිපත් කරන සජීවී රූකඩ සංදර්ශනයයි. මීට අමතරව කිරිබත්ගොඩ, පිටකොටුව, මාලඹේ, මහරගම, ගොඩගම, හෝමාගම, ග්රෑන්ඩ්පාස්, කොස්ගස්හන්දිය, දෙමටගොඩ, තොටළඟ, පිළියන්දල, බෙල්ලන්විල සහ ගම්පහ යන ප්රදේශවල ද දර්ශනීය තොරණ ඉදිකර තිබේ.
කොළඹ බේරේ වැව අවට, හුනුපිටිය, ගාලු මුවදොර, මාතර, කළුතර, දැදිගම, අම්පාර, ගම්පහ, පදියතලාව, මොරවක, බුත්තල සහ වේයන්ගොඩ ඇතුළු ප්රදේශ රැසක වෙසක් කලාප සංවිධානය කර ඇත. මෙවර ‘බුද්ධ රශ්මි’ වෙසක් කලාපය යටතේ LED සහ ඩිජිතල් ආලෝක තාක්ෂණය, පරිසර හිතකාමී ද්රව්ය සහ ජාතක කතා තේමා කරගත් දැවැන්ත තොරණ වැඩි වශයෙන් දැකිය හැකිය.
ශ්රී ලංකා මහජන සෞඛ්ය පරීක්ෂකවරුන්ගේ සංගමය සඳහන් කරන පරිදි මේ වන විටත් දිවයින පුරා දන්සල් 15,000කට ආසන්න ප්රමාණයක් ලියාපදිංචි වී ඇති අතර, බෝවන රෝග ව්යාප්තිය හේතුවෙන් සංවිධායකයන් නිසි සෞඛ්යාරක්ෂිත ක්රමවේද අනුගමනය කිරීම අනිවාර්ය වේ. මැයි 27 සිට ජුනි 02 දක්වා වෙසක් සතිය ලෙස ප්රකාශයට පත්කර ඇති අතර, වෙසක් සතිය යෙදෙන මැයි 30, 31 සහ ජුනි 01 දින තුන දිවයින පුරා මස් පිණිස සතුන් මරණ ස්ථාන සහ මස් මාංස අලෙවිසල්, රේස් බුකි, කැසිනෝ ශාලා හා සමාජශාලා වසා තබන ලෙස රජය දැනුම් දී ඇත. තවද, වෙසක් උත්සවය නිමිත්තෙන් ලබන 30 හා 31 දෙදින දිවයිනේ සියලුම සුරාසල් වසා තැබීමට ද දැනුම් දී තිබේ.
