ගාසා යුද්ධයෙන් පසු ඊශ්රායල අග්රාමාත්ය බෙන්ජමින් නෙතන්යාහුගේ දේශපාලන අනාගතය තීරණය කෙරෙන මහ මැතිවරණය එළඹෙන ඔක්තෝබර් 27 දා පැවැත්වීමට නියමිත බව ඊශ්රායල පාර්ලිමේන්තුව නිවේදනය කරයි. මෙය නීත්යානුකූලව නියමිත අවසාන දිනය වන අතර, දශක කිහිපයකට පසු ඊශ්රායල පාලක සන්ධානයක් තම පූර්ණ සිව් වසරක ධුර කාලය සම්පූර්ණ කරමින් මෙම මැතිවරණයට මුහුණ දෙයි.
76 හැවිරිදි වියේ පසුවන ඊශ්රායලයේ දීර්ඝතම කාලයක් අග්රාමාත්ය ධුරය දැරූ නෙතන්යාහු, මෙම මැතිවරණය තම දේශපාලන ජීවිතයේ තීරණාත්මකම තරගය ලෙස සලකමින් නැවතත් තරග කිරීමට සිය අභිප්රාය ප්රකාශ කර තිබේ. තම දක්ෂිණාංශික සන්ධානය ශක්තිමත් කිරීමට රජය මේ දිනවල නීති කෙටුම්පත් කිහිපයක් සම්මත කර ගැනීමට උත්සාහ දරමින් සිටියි.
නෙතන්යාහු ඉදිරි මැතිවරණය සඳහා පුළුල් ජාතික රජයක් පිහිටුවීමේ අරමුණින් ජාතික එකමුතුව තේමා කරගනිමින් සිය මැතිවරණ ව්යාපාරය මෙහෙයවීමට සූදානම් වේ. කෙසේ වෙතත්, නවතම මත විමසුම්වලට අනුව ඊශ්රායල වැසියන් බහුතරයක් ඔහු තනතුරෙන් ඉවත් වනු දැකීමට කැමැත්ත පළ කර ඇති අතර, හිටපු හමුදා ප්රධානී ගාඩි අයිසන්කොට් ඔහුගේ ප්රධානතම දේශපාලන ප්රතිවාදියා ලෙස මතුව සිටියි.
මැතිවරණ ප්රතිඵල කෙරෙහි බලපෑ හැකි ප්රධාන සාධක කිහිපයක් පවතී. ඉරානය සමඟ යුද්ධයෙන් පසුව ඇතිවූ සටන් විරාමය පිළිබඳව ඊශ්රායල මහජන මතය දැඩි විවේචනාත්මක මට්ටමක පවතින අතර, ඉරානය මෙම යුද්ධයෙන් ජයග්රහණය කළ බව 92%කට වඩා වැඩි ඊශ්රායල ජාතිකයින් විශ්වාස කරයි. එසේම, ඔක්තෝබර් 7 ප්රහාරය වටා ඇති ආරක්ෂක අසාර්ථකත්වය නෙතන්යාහුගේ ප්රතිරූපයට තවමත් දැඩි බලපෑමක් එල්ල කරයි. මීට අමතරව අල්ට්රා-ඕතඩොක්ස් යුදෙව්වන් හමුදා සේවයට බඳවා ගැනීම සම්බන්ධයෙන් පවතින උග්ර මතභේදය සහ යුද්ධයට පෙර ඔහු විසින් ආරම්භ කළ අධිකරණ ප්රතිසංස්කරණ සහ තමාට එරෙහිව පවතින දූෂණ නඩු ද ඔහුගේ දේශපාලන ගමනට බාධාවකි.
කෙසේ වෙතත්, ඉරානය සහ හිස්බුල්ලා සංවිධානයට එරෙහිව සිදු කළ හමුදා මෙහෙයුම් තම මැතිවරණ ව්යාපාරයේ කේන්ද්රස්ථානය කර ගැනීමට නෙතන්යාහු සැලසුම් කරයි. ඉරාන පැවැත්මේ තර්ජනය ඉවත් කිරීමෙන් පසු, අපට සාමය උදා කර ගැනීමට සහ කලාපීය ජයග්රහණවල පල නෙළා ගැනීමට හැකි වනු ඇතැයි ඔහු පවසයි.
