යාපනය චෙම්මනි සිත්තුපාත්තු සුසාන භූමිය ආසන්නයේ පිහිටි සමූහ මිනීවළේ හයවන අදියරේ කැණීම් කටයුතු පිළිබඳ නවතම තොරතුරු වාර්තා වේ.
හයවන අදියරේ කැණීම් කටයුතු හයවන දිනටත් ඊයේ (03) සිදු කරන ලද අතර එහිදී මිනිස් සිරුරු 245කට අදාළ අස්ථි කොටස් හඳුනාගෙන තිබේ. ඉන් සිරුරු 243කට අදාළ අස්ථි කොටස් මේ වන විට ගොඩගෙන ඇති බව අතුරුදහන්වූවන්ගේ ඥාතීන් වෙනුවෙන් පෙනී සිටින නීතිඥ වි.කේ. නිරංජන් මහතා ප්රකාශ කර ඇත.
හයවන අදියරේ කැණීම් පසුගිය අප්රේල් 27 වැනිදා යාපනය මහේස්ත්රාත් එස්. ලෙනින්කුමාර් මහතාගේ අධීක්ෂණය යටතේ ආරම්භ විය. මීට පෙර පස්වන අදියරේ කැණීම් කටයුතු 2025 සැප්තැම්බර් 06 වැනිදා අවසන් කරන විට සිරුරු 240ක අස්ථි කොටස් මතුකරගෙන තිබූ අතර ඉන් සිරුරු 239ක් ගොඩගෙන තිබුණි.
යාපනය මහේස්ත්රාත්වරයාගේ අධීක්ෂණය යටතේ කැළණිය විශ්වවිද්යාලයේ ජ්යෙෂ්ඨ මහාචාර්ය රාජ් සෝමදේව මහතා සහ යාපනය විශ්වවිද්යාලයේ අධිකරණ වෛද්ය විශේෂඥ වෛද්ය සෙල්ලයියා පිරනවන් මහතා ඇතුළු කණ්ඩායමක් මෙම කැණීම් සිදු කරයි.
කැණීම්වලදී හමුවූ අස්ථි කොටස් සහ අනෙකුත් භාණ්ඩ අධිකරණ නියෝග මත යාපනය විශ්වවිද්යාලයේ අධිකරණ වෛද්ය විද්යා පීඨය භාරයේ සුරක්ෂිතව තබා ඇත. ඉදිරි කැණීම් කටයුතු ස්කෑන් පරීක්ෂණ වාර්තා සැලකිල්ලට ගනිමින් සිදු කිරීමට නියමිතය.
