අභාවප්රාප්ත හිටපු රාජ්ය ඇමැති සනත් නිශාන්ත මහතාගේ සහෝදරයා වන ආරච්චිකට්ටුව ප්රාදේශීය සභාවේ හිටපු සභාපති සහ ශ්රී ලංකා පොදුජන පෙරමුණේ හලාවත සම සංවිධායක ජගත් සමන්ත මහතාට බරපතළ වැඩ සහිත අවුරුදු පහ හමාරක (5 ½) සිරදඬුවමක් හලාවත මහාධිකරණය විසින් ඉකුත් 15 වැනිදා නියම කර තිබේ. මීට අමතරව රුපියල් ලක්ෂ 10ක වන්දි මුදලක් සහ රුපියල් 136,000ක දඩයක් ගෙවන ලෙසත්, වන්දි මුදල නොගෙවන්නේ නම් තවත් මාස 24ක සිරදඬුවමක් පනවන ලෙසත් මහාධිකරණ විනිසුරු නයෝමි වික්රමසේකර මහත්මිය නියෝග කළාය.
මෙම නඩුවට පාදක වී ඇත්තේ 2008 නොවැම්බර් 24 වැනිදා ආරච්චිකට්ටුව, කරුක්කුලිය, ජයතිලිනාරම විහාරස්ථානයේදී එවකට ආරච්චිකට්ටුව ප්රාදේශීය ලේකම්වරයාව සිටි ධනසේන සුරසිංහ මහතාට පහර දී රාජකාරියට බාධා කිරීම ඇතුළු චෝදනා කිහිපයකි. නීති විරෝධී ලෙස කපා තිබූ දැව තොගයක් මැනුම් කටයුතු කිරීමට පොලිසිය සහ වන නිලධාරීන් සමඟ ගිය ප්රාදේශීය ලේකම්වරයා ඇතුළු පිරිසට, ජගත් සමන්ත මහතා ප්රමුඛ පිරිසක් විහාරස්ථානයේ ගණ්ඨාරය ගසා ජනතාව කැඳවමින් බාධා කර තිබූ අතර, පසුව එහි පැමිණි එවකට වයඹ පළාත් සභා මන්ත්රී සනත් නිශාන්ත මහතා ප්රාදේශීය ලේකම්වරයාගේ කම්මුලට පහර දී තිබූ බව නඩුවේදී තහවුරු විය. මෙම සිදුවීම නිසා තමන් දැඩි ලැජ්ජාවට හා පීඩනයට පත්ව පසුව ස්ථාන මාරුවක් ලබා ගිය බව ධනසේන සුරසිංහ මහතා අධිකරණය හමුවේ ප්රකාශ කර තිබුණි.
2017 වසරේ සිට වසර 9ක් තිස්සේ විභාග වූ මෙම නඩුවේ පළමු චුදිතයා ලෙස නම් කර සිටි සනත් නිශාන්ත මහතා අභාවප්රාප්ත වී ඇති බැවින්, දෙවැනි චුදිත ජගත් සමන්ත මහතාට මෙලෙස තීන්දුව ප්රකාශයට පත් කෙරුණි. තීන්දුව ලබා දෙමින් විනිසුරුවරිය අවධාරණය කළේ රාජ්ය සේවකයන්ට තම රාජකාරිය ස්වාධීනව සහ බියෙන් සැකෙන් තොරව ඉටු කිරීමට හැකි පරිසරයක් රට තුළ පැවතිය යුතු බවයි.
