දිට්වා සුළි කුණාටුවෙන් පීඩාවට පත් ජන ජීවිත කඩිනමින් යථා තත්ත්වයට පත් කිරීම සඳහා රුපියල් මිලියන 445ක (ඇමෙරිකානු ඩොලර් මිලියන 1.33) මූල්ය ආධාරයක් ශ්රී ලංකාවට ලබා දීමට ජපාන රජය සහ එක්සත් ජාතීන්ගේ සංවර්ධන වැඩසටහන (UNDP) පියවර ගෙන තිබේ.
මේ සඳහා වූ විශේෂ ගිවිසුම ඊයේ (10) ශ්රී ලංකාවේ ජපාන තානාපති කාර්යාලයේදී අත්සන් කෙරිණි. ජපාන තානාපති අකියො ඉසොමතා මහතා, UNDP නේවාසික නියෝජිත අසුසා කුබෝටා මහත්මිය සහ රාජ්ය පරිපාලන, පළාත් සභා හා පළාත් පාලන අමාත්යාංශයේ ලේකම් එස්. ආලෝක බණ්ඩාර මහතා විසින් මෙම ත්රෛපාර්ශ්වික ගිවිසුමට අත්සන් තබන ලදී.
“දිට්වා සුළි කුණාටුවෙන් බලපෑමට ලක්වූ ප්රජාවන්හි සහභාගිත්ව ප්රවේශයක් හරහා ආපදා අපද්රව්ය ඉවත් කිරීම සහ ප්රජා පහසුකම් පුනරුත්ථාපනය කිරීමේ ව්යාපෘතිය” ලෙස මෙය නම් කර ඇත. මෙමඟින් පරිසර හිතකාමී විදුලි ත්රිරෝද රථ භාවිත කරමින් ප්රතිචක්රීකරණය කළ හැකි අපද්රව්ය කළමනාකරණය කිරීම සහ සෞඛ්ය, අධ්යාපන, ළමා සුරැකුම් වැනි අත්යවශ්ය සේවා සපයන බහුකාර්ය ප්රජා පහසුකම් ප්රතිසංස්කරණය කිරීමට නියමිතය.
2025 නොවැම්බර් අග භාගයේදී මෙරටට බලපෑ දිට්වා සුළි කුණාටුවෙන් මිලියන 1.7ක ජනතාවක් පීඩාවට පත් වූ අතර, මෙම නව ව්යාපෘතිය හරහා වැඩිම හානියක් සිදුවූ මධ්යම පළාතේ ප්රජාව කේන්ද්ර කර ගනිමින් කටයුතු කෙරේ. මේ යටතේ පුද්ගලයන් 228,500 කට සෘජු ප්රතිලාභ ද, තවත් ලක්ෂ 7ක පමණ ජනතාවකට වක්ර ප්රතිලාභ ද හිමි වන බව UNDP ආයතනය පවසයි.
