එක් පුද්ගලයෙක් ඉලක්ක නොකර සියලු දෙනාට පොදු ආකාරයෙන් විනිසුරුවරුන්ගේ විශ්රාම වයස දීර්ඝ කිරීම කිසිදු ගැටළුවක් නොවන බව මල්වතු පාර්ශ්වයේ මහානායක අතිපූජ්ය තිබ්බටුවාවේ ශ්රී සිද්ධාර්ථ සුමංගල මහනාහිමියෝ ප්රකාශ කරති. මෙම තීරණය අධිකරණ විනිසුරුවරුන්ට පමණක් සීමා නොකර අනෙකුත් අත්යවශ්ය ක්ෂේත්ර සඳහා ද ලබාදීම වැදගත් බව උන්වහන්සේ පෙන්වා දුන්හ.
සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස සහ අධිකරණ අමාත්ය හර්ෂණ නානායක්කාර යන මහත්වරුන් මල්වතු මහා විහාරයට පැමිණ මහානායක ස්වාමීන්ද්රයන් වහන්සේ බැහැදැක අදාළ සංශෝධන සම්බන්ධයෙන් දැනුවත් කළ අවස්ථාවේදී උන්වහන්සේ මේ බව සඳහන් කළහ.
මෙම සාකච්ඡාවේදී අදහස් දැක්වූ අධිකරණ අමාත්ය හර්ෂණ නානායක්කාර මහතා සඳහන් කළේ මෙය කිසිදු පුද්ගලයෙකු ඉලක්ක කර සිදුකරන දෙයක් නොවන බවත්, ශ්රේෂ්ඨාධිකරණයේ හා අභියාචනාධිකරණයේ පමණක් නොව දිසා, මහේස්ත්රාත් සහ මහාධිකරණ යන සියලුම විනිසුරුවරුන්ගේ විශ්රාම වයස දීර්ඝ කිරීමට අපේක්ෂා කරන බවත්ය. 1978න් පසු මෙම වයස් සීමාව කිසිදු ආකාරයකින් සංශෝධනය වී නොමැති බවද ඔහු පැවසීය.
එහිදී වැඩිදුරටත් අදහස් දැක්වූ සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා පෙන්වා දුන්නේ වෘත්තීයවේදීන් රට හැර යාම හේතුවෙන් විශේෂඥ වෛද්යවරුන්ගේ සේවා කාලය වයස 63 දක්වා වැඩි කළ ආකාරයටම, අනෙකුත් ක්ෂේත්රවලද මතු වී ඇති පුරප්පාඩු සහ බන්ධනාගාරගත රැඳවියන්ගේ අධික තදබදය පාලනය කිරීම සඳහා අධිකරණ පද්ධතියේ පුළුල් ප්රතිසංස්කරණ සිදුකිරීමට රජය බලාපොරොත්තු වන බවයි.
