පවතින අධික වර්ෂාපතනයත් සමඟ ඇති වූ දැඩි ජල ගැලීම් හේතුවෙන් කටුනායක – මිනුවන්ගොඩ ප්රධාන මාර්ගය නයිකන්ද ප්රදේශයෙන් සම්පූර්ණයෙන්ම ජලයෙන් යටවී රථවාහන ගමනාගමනය අවහිර වී තිබේ. මාර්ගයේ පවතින අනතුරුදායක තත්ත්වය සැලකිල්ලට ගෙන, එම මාර්ගය පරිහරණය කරන රියදුරන්ට පීඩාවකින් තොරව ගමන් කිරීම සඳහා පොලිසිය විසින් හදිසි විකල්ප මාර්ග කිහිපයක් හඳුන්වා දී ඇත.
ඒ අනුව කොළඹ සිට අධිවේගී මාර්ගය ඔස්සේ කටුනායක හරහා කුරුණෑගල අධිවේගී මාර්ගය වෙත ගමන් ගැනීමට සැලසුම් කර ඇති රථවාහනවලට ජා-ඇල සහ මිනුවන්ගොඩ මාර්ගය හරහා ගමන් කළ හැකිය. එමෙන්ම කුරුණෑගල අධිවේගී මාර්ගයේ සිට කටුනායක හරහා කොළඹ දක්වා ගමන් ගන්නා රථවාහනවලට මිනුවන්ගොඩ සහ ජා-ඇල හරහා සිය ගමනාන්ත කරා ළඟාවීමේ හැකියාව පවතී. මීට අමතරව ගම්පහ දෙසින් පැමිණෙන රථවාහන සඳහා මිනුවන්ගොඩ සහ සීදූව හරහා හෝ මිනුවන්ගොඩ සහ ජා-ඇල මාර්ගය ඔස්සේ ගමන් කිරීමට විකල්ප මාර්ග විවෘතව පවතින බව පොලිසිය ප්රකාශ කරයි.
නයිකන්ද ප්රදේශයේ ජල මට්ටම තවදුරටත් ඉහළ යමින් පවතින බැවින්, කුඩා වාහන සහ යතුරුපැදි ධාවනයේදී දැඩි ලෙස සැලකිලිමත් වන ලෙසත්, හැකිතාක් ඉහත සඳහන් කළ විකල්ප මාර්ග පමණක් භාවිත කරන ලෙසත් රථවාහන පොලිසිය රියදුරන්ගෙන් හදිසියේ ඉල්ලා සිටියි.
