ගල්ගමුව, සියඹලන්ගමුව ප්‍රදේශයේ රෝගාතුරව සිටින කාවන්තිස්ස ඇතාට ප්‍රතිකාර කිරීමේදී බාධා නොවන අයුරින් කටයුතු කරන ලෙස පරිසර අමාත්‍යාංශය ජනතාවගෙන් ඉල්ලා තිබේ.
ඇතාට අවශ්‍ය ප්‍රතිකාර ලබාදීම මේ වනවිටත් සිදුකරන අතර, එහි සෞඛ්‍ය තත්ත්වය නිරීක්ෂණය කිරීමට වනජීවී නිලධාරීන් සහ පශු වෛද්‍ය කණ්ඩායම් කටයුතු කරමින් සිටින බව වාර්තා වේ.
ඇතා නැරඹීම සඳහා විශාල පිරිසක් එම ස්ථානයට පැමිණීම හේතුවෙන් ප්‍රතිකාර කටයුතුවලට බාධා ඇතිවිය හැකි බවට අවධානය යොමු කර තිබේ.
ඒ අනුව, ප්‍රතිකාර සිදුකරන ප්‍රදේශයට අනවශ්‍ය ලෙස ඇතුළු නොවීම, එම ස්ථානය අවට රැස්වීමෙන් හා ශබ්ද කිරීමෙන් වැළකීම සහ වෛද්‍ය කණ්ඩායමට නිදහසේ කටයුතු කිරීමට ඉඩ ලබාදීම වැදගත් වේ.
එමෙන්ම, ප්‍රතිකාර කලාපය තුළ අවසරයකින් තොරව ඩ්‍රෝන කැමරා භාවිත නොකරන ලෙසද දැනුම් දී තිබේ.
කාවන්තිස්ස ඇතාට ප්‍රතිකාර ලබාදීමේදී නිහඬ සහ සන්සුන් පරිසරයක් පවත්වා ගැනීමට සහාය වීම තුළින් එහි සෞඛ්‍ය තත්ත්වය රැකගැනීමට දායක විය හැකිය.
