ශ්රී ලංකා ක්රිකට් ක්ෂේත්රයේ ප්රමුඛතම තරඟාවලිය වන ලංකා ප්රිමියර් ලීග් (LPL) තරඟාවලියේ 2026 වසර සඳහා වන ක්රීඩක තේරීමේ ක්රියාවලිය IPG සමූහය විසින් කොළඹදී ඉතා සාර්ථකව අවසන් කරන ලදී. තරඟාවලියේ හයවන අදියර සනිටුහන් කරමින් පැවති මෙම ක්රීඩක තේරීමේ අවස්ථාව සඳහා කණ්ඩායම් හිමිකරුවන්, නියෝජිතයින් සහ ක්රිකට් ක්ෂේත්රයේ ප්රධාන පාර්ශවකරුවන් රැසක් එක්ව සිටියහ.
මෙවර තරඟාවලිය සඳහා SC Jaffna Kings, Galle Gallants, Kandy Royals, Dambulla Sixers සහ Colombo Kaps යන කණ්ඩායම් තරඟ වදින අතර, දෙස් විදෙස් ක්රීඩකයින්ගේ සම්මිශ්රණයෙන් තරඟාවලිය වඩාත් උද්වේගකර වනු ඇතැයි අපේක්ෂා කෙරේ. මෙම ක්රීඩක තේරීම හරහා LPL තරඟාවලිය වෘත්තීය මට්ටමින් සහ වාණිජමය වශයෙන් ලබා ඇති දියුණුව මනාව පැහැදිලි වන බව සංවිධායකයෝ පෙන්වා දෙති.
තරුණ කටයුතු හා ක්රීඩා අමාත්ය සුනිල් කුමාර ගමගේ මහතා අදහස් දක්වමින් සඳහන් කළේ ශ්රී ලංකා ක්රිකට් ක්රීඩකයන්ට ජාත්යන්තර මට්ටමේ අවස්ථා ලබා දෙමින් රටේ ක්රිකට් ශක්තිය ඉහළ නැංවීමට මෙම තරඟාවලිය විශාල දායකත්වයක් ලබා දෙන බවයි. එමෙන්ම ලෝක මට්ටමේ ක්රිකට් තරඟාවලි සංවිධානය කිරීමට ශ්රී ලංකාවට ඇති හැකියාව තහවුරු කිරීමට මෙය කදිම අවස්ථාවක් බවද ඔහු පැවසීය.
LPL තරගාවලි අධ්යක්ෂ සමන්ත දොඩන්වෙල මහතා ප්රකාශ කළේ තෝරාගත් දේශීය හා ජාත්යන්තර ක්රීඩකයන්ගේ විශිෂ්ටත්වය මගින් තරගාවලිය කෙරෙහි පවතින විශ්වාසය සහ ආකර්ෂණය තවදුරටත් තහවුරු වන බවයි. IPG සමූහයේ නිර්මාතෘ සහ ප්රධාන විධායක නිලධාරී අනිල් මෝහන් මහතා කියා සිටියේ ශ්රී ලංකා ක්රිකට් ආයතනයේ සහ අනෙකුත් පාර්ශවකරුවන්ගේ සහයෝගයෙන් අති දක්ෂ ක්රීඩකයන් කණ්ඩායම් සඳහා එක් කර ගැනීමට හැකි වූ බවත්, ප්රේක්ෂකයන්ට ඉතා උද්වේගකර තරඟාවලියක් දැකබලා ගැනීමට අවස්ථාව උදා වන බවත්ය.
ඡායාරූපයෙහි වමේ සිට LPL හි අධ්යක්ෂ සමන්ත දොඩම්වෙල, තරුණ කටයුතු හා ක්රීඩා අමාත්ය සුනිල් කුමාර ගමගේ සහ IPG හි නිර්මාතෘ හා ප්රධාන විධායක නිලධාරී අනිල් මොහාන් යන මහත්වරුන් දැක්වේ.
