ලලිත් ඇතුලත්මුදලි මහපොළ උසස් අධ්යාපන ශිෂ්යත්ව භාරකාර අරමුදල ශක්තිමත් කිරීමේ අරමුණින් නිර්මාණය කරන ලද “මහපොළ ආදි විද්යාර්ථී වෙබ් ද්වාරය” (Alumni Web Portal) අද (12) දින නිල වශයෙන් එළිදක්වන ලදී. අග්රාමාත්ය ආචාර්ය හරිනි අමරසූරිය මහත්මියගේ ප්රධානත්වයෙන් කොළඹ ශ්රී ලංකා පදනම් ආයතනයේදී මෙම උත්සවය පැවැත්වුණු අතර, මෙයට සමගාමීව 2023/2024 වර්ෂය සඳහා මහපොළ ශිෂ්යත්ව සහතික පත්ර ප්රදානය ද සංකේතවත් ලෙස සිදු කෙරිණි.
මෙම නව ආදි විද්යාර්ථී එකමුතුව හරහා ලොව පුරා විසිරී සිටින මහපොළ ආදි විද්යාර්ථයින් එකම ජාලයකට ඒකරාශී කරමින් ඔවුන්ගේ දැනුම සහ අත්දැකීම් වර්තමාන සිසුන් සමඟ බෙදා ගැනීමට අවස්ථාව සැලසේ. එසේම ආදි විද්යාර්ථයින්ගේ සේවා ස්ථානවල පවතින රැකියා සහ පුහුණු අවස්ථා පිළිබඳව සිසුන් දැනුවත් කිරීම, විදේශයන්හි වෙසෙන ආදි විද්යාර්ථයින් අතර අන්යෝන්ය සම්බන්ධතා ගොඩනඟා ගැනීම සහ මහපොළ ශිෂ්යත්ව අරමුදල ශක්තිමත් කිරීමට දායක විය හැකි ක්රමවේදයක් සැකසීම මෙහි ප්රධාන ප්රතිලාභ වේ. මහපොළ ශිෂ්යත්ව ලබා නොගත් නමුත් මෙරට විශ්වවිද්යාලවලින් අධ්යාපනය ලැබූවන්ට ද මෙහි “ආශ්රිත සාමාජිකත්වය” ලබා ගැනීමට අවස්ථාව සලසා ඇත.
මෙම උත්සවයේදී සිසුන් 130 දෙනෙකුට නාමිකව සහතික පත්ර පිරිනැමූ අතර, ඉදිරියේදී දිවයින පුරා සිටින සිසුන් 17,000කට අධික පිරිසකට මෙම ශිෂ්යත්ව පිරිනැමීමට නියමිතය. උසස් අධ්යාපන සිසුන්ගේ මූල්ය ස්ථායිතාව උදෙසා මහපොළ ශිෂ්යත්ව වාරිකය රුපියල් 5,000 සිට රුපියල් 10,000 දක්වා ඉහළ නැංවීමට ගෙන ඇති පියවර නවක ශිෂ්යත්ව ලාභීන්ට ද හිමිවන බව මෙහිදී අවධාරණය කෙරිණි. සියලුම ආදි විද්යාර්ථයින්ට https://alumni.mahapola.lk වෙබ් අඩවිය හරහා හෝ QR කේතය මඟින් මෙම නව එකමුතුව සඳහා ලියාපදිංචි විය හැක.
