2026 සැප්තැම්බර් 28 වැනිදා පැවැත්වීමට නියමිතව තිබූ 2024/2025 අධ්‍යයන වර්ෂයට අදාළ මහපොළ උසස් අධ්‍යාපන ශිෂ්‍යත්ව ප්‍රදානෝත්සවය නොවැළැක්විය හැකි හේතුවක් මත කල් දමා තිබේ.
ලලිත් ඇතුලත්මුදලි මහපොළ උසස් අධ්‍යාපන ශිෂ්‍යත්ව භාර අරමුදල විසින් සිසුන් වෙත දැනුම්දී ඇත්තේ අද පැවැත්වීමට නියමිතව තිබූ උත්සවයට සහභාගී වීමට කටයුතු නොකරන ලෙසයි.
ප්‍රදානෝත්සවය පැවැත්වෙන නව දිනය, වේලාව සහ ස්ථානය මහපොළ භාර අරමුදලේ නිල සන්නිවේදන මාර්ග ඔස්සේ ඉදිරියේදී දැනුම්දීමට නියමිතය.
එමෙන්ම, උත්සවය කල්දමා ඇති බැවින් 2026 සැප්තැම්බර් 28 වැනිදා සිට බලපැවැත්වෙන පරිදි මහපොළ ශිෂ්‍යත්ව සහතික නිකුත් නොකරන බවත්, සංශෝධිත ක්‍රමවේදය සහ සහතික නිකුත් කිරීම සම්බන්ධ වැඩිදුර තොරතුරු පසුව දැනුම්දෙන බවත් සඳහන් කර තිබේ.
සිසුන්ට නවතම තොරතුරු සඳහා මහපොළ භාර අරමුදලේ නිල සන්නිවේදන මාර්ග සහ වෙබ් අඩවිය නිරන්තරයෙන් පරීක්ෂා කරන ලෙස දැනුම්දී ඇත.
