එක්සත් ජනපද පරිපාලනය විසින් හෝර්මූස් සමුද්ර සන්ධිය හරහා නැව් ගමනාගමනය යළි ස්ථාපිත කිරීමේ අරමුණින් නව ජාත්යන්තර සන්ධානයක් ගොඩනැගීමට පියවර ගනිමින් සිටියි. “මැරිටයිම් ෆ්රීඩම් කන්ස්ට්රක්ට්” (Maritime Freedom Construct) ලෙස නම් කර ඇති මෙම නව සන්ධානය හරහා තොරතුරු හුවමාරු කර ගැනීම, රාජ්යතාන්ත්රික කටයුතු සම්බන්ධීකරණය කිරීම සහ සම්බාධක ක්රියාත්මක කිරීමට සහාය වීම සිදු කෙරේ. අමෙරිකානු රාජ්ය දෙපාර්තමේන්තුව විසින් එරට තානාපති කාර්යාල වෙත යවා ඇති අභ්යන්තර කේබල් පණිවිඩයකට අනුව, මෙම කලාපයේ නිදහස් නාවික ගමනාගමනය සුරක්ෂිත කර ගැනීම සඳහා විදේශීය හවුල්කරුවන්ගේ සහයෝගය ලබා ගැනීමට අමෙරිකාව බලාපොරොත්තු වේ. ඉරානය විසින් මෙම සමුද්ර සන්ධිය ආශ්රිතව දිය යට බෝම්බ ඇටවීම සහ තෙල් ප්රවාහන නෞකාවලට ප්රහාර එල්ල කිරීම හේතුවෙන් ප්රදේශයේ නාවික කටයුතු දැඩි ලෙස අඩාල වී ඇත. මේ අතර, අමෙරිකානු ජනාධිපති ඩොනල්ඩ් ට්රම්ප් ප්රකාශ කර ඇත්තේ ඉරානය තම න්යෂ්ටික වැඩපිළිවෙල අත්හරින තුරු හෝර්මූස් සමුද්ර සන්ධියේ පවතින අවහිරතා සහ නාවික සීමා කිරීම් දිගටම පවත්වාගෙන යාමට සූදානම් බවයි. ගෝලීය බලශක්ති සැපයුමට විශාල බලපෑමක් එල්ල කර ඇති මෙම තත්ත්වය මධ්යයේ, අමෙරිකාව මෙම සන්ධානය හරහා මිත්ර රටවල සහයෝගය ලබා ගැනීමට දැඩි උත්සාහයක නිරතව සිටී.
