තම සමාජ මාධ්ය ජාලයන්ට ඇබ්බැහි වීම සම්බන්ධයෙන් ලබා දුන් ඓතිහාසික නඩු තීන්දුව අවලංගු කරන ලෙස Meta සමාගම එක්සත් ජනපද විනිසුරුවරයෙකුගෙන් ඉල්ලා තිබේ.
පසුගිය මාර්තු මාසයේදී එක්සත් ජනපද ජූරි සභාව විසින් තීරණය කරනු ලැබුවේ Meta සහ Google (YouTube) යන සමාගම් තම වේදිකාවන් සැලසුම් කිරීමේදී නොසලකා හැරීමෙන් කටයුතු කර ඇති බවත්, ඒවා භාවිතයේ පවතින අනතුරු පිළිබඳව පරිශීලකයන් දැනුවත් කිරීමට අපොහොසත් වී ඇති බවත්ය. ඒ අනුව, සමාජ මාධ්යවලට ඇබ්බැහි වීම සහ දැඩි මානසික අවපීඩනයට ලක්වීම හේතුවෙන් අගතියට පත් 20 හැවිරිදි තරුණියකට (KGM) අමෙරිකානු ඩොලර් මිලියන 6ක වන්දියක් ගෙවන ලෙස නියෝග කෙරිණි. දිනකට පැය 16ක් දක්වා සමාජ මාධ්ය භාවිත කිරීමට තමා පෙළඹුණු බවත්, එය තම මානසික සෞඛ්යයට දැඩි ලෙස බලපෑ බවත් ඇය අධිකරණයේදී සාක්ෂි ලබා දුන්නාය.
කෙසේ වෙතත්, Meta සමාගම තර්ක කරන්නේ එක්සත් ජනපද සන්නිවේදන විනීතභාවය පිළිබඳ පනතේ (Communications Decency Act) 230 වැනි වගන්තිය යටතේ පරිශීලකයන් විසින් නිර්මාණය කරනු ලබන අන්තර්ගතයන්ගෙන් සිදුවන හානි සම්බන්ධයෙන් අන්තර්ජාල වේදිකාවන්ට වගකීමක් නොමැති බවයි. එම ආරක්ෂණ නීතිය යටතේ තමන්ට මෙම නඩුවෙන් නිදහස් විය හැකි බව පවසන සමාගම, අදාළ තීන්දුව අවලංගු කර තමන්ට වාසිදායක තීන්දුවක් ලබා දෙන ලෙස හෝ නැවත නඩු විභාගයක් පවත්වන ලෙස ඉල්ලා තිබේ.
