සයිබර් අපරාධ සංඛ්යාව මෙන්ම ඒ සම්බන්ධයෙන් ලැබෙන පැමිණිලි සංඛ්යාව ද දිනෙන් දින ඉහළ යමින් පවතින බැවින්, පරිගණක අපරාධ සහ අනෙකුත් අපරාධ මැඬලීම සඳහා පවතින නීති සංශෝධනය කිරීමට අධිකරණ අමාත්යාංශය සමඟ එක්ව ඒකාබද්ධ වැඩපිළිවෙළක් ක්රියාත්මක කරන බව මහජන ආරක්ෂක හා පාර්ලිමේන්තු කටයුතු අමාත්ය ආනන්ද විජේපාල මහතා පාර්ලිමේන්තුවේදී ප්රකාශ කළේය.
පාර්ලිමේන්තු මන්ත්රී රජීවන් ජෙයචන්ද්ර මූර්ති මහතා මතු කළ ප්රශ්නයකට පිළිතුරු දෙමින් අමාත්යවරයා සඳහන් කළේ, ශ්රී ලංකා පොලීසිය මේ සම්බන්ධයෙන් විශේෂ අවධානයක් යොමු කර ඇති අතර මහ බැංකුවේ මූල්ය බුද්ධි ඒකකය සමඟ සම්බන්ධ වී සයිබර් අපරාධ මැඬලීමට පුළුල් ක්රියාමාර්ග ගනිමින් සිටින බවයි.
දැනටමත් අපරාධ පරීක්ෂණ දෙපාර්තමේන්තුව යටතේ බස්නාහිර, මධ්යම, දකුණු, නැඟෙනහිර, වයඹ, උතුරු මැද හා උතුරු පළාත් ආවරණය වන පරිදි පරිගණක අපරාධ හදිසි ඒකක ස්ථාපිත කර ඇති අතර, ඌව හා සබරගමුව පළාත් සඳහා ද නව ඒකක ආරම්භ කිරීමට නියමිත බව අමාත්යවරයා පැවසීය. සයිබර් මූල්ය අපරාධ විමර්ශනය කිරීමේදී නව තාක්ෂණික මෙවලම් භාවිත කරන බවත්, මෙවැනි අපරාධ විමර්ශනය සඳහා කෘත්රිම බුද්ධිය (AI) යොදා ගැනීම සම්බන්ධයෙන් පූර්ණ අධ්යයනයක් සිදු කරමින් සිටින බවත් ඔහු වැඩිදුරටත් කියා සිටියේය.
ඩිජිටල් ආර්ථික අමාත්යාංශය යටතේ ක්රියාත්මක වන ශ්රී ලංකා පරිගණක හදිසි ප්රතිචාර සංසදය (Sri Lanka CERT) සමඟ එක්ව, මහජනයා දැනුවත් කිරීම, ඕ.ටී.පී. (OTP) වංචා සහ මූල්ය අක්රමිකතා හඳුනා ගැනීම සඳහා 2026-2029 කාලසීමාව වෙනුවෙන් විශේෂ ක්රියාමාර්ග රැසක් සැලසුම් කර ඇත. මහ බැංකුවේ මූල්ය බුද්ධි ඒකකය, සර්ට් (CERT) ආයතනය සහ ඩිජිටල් අමාත්යාංශය ඇතුළු ආයතන ඒකාබද්ධ කරමින් අනාගතයේ ඇති විය හැකි සයිබර් අපරාධ සම්බන්ධයෙන් විශේෂ අවධානයක් යොමු කිරීමට මහජන ආරක්ෂක අමාත්යාංශය කටයුතු කරමින් සිටින බව ද අමාත්යවරයා අවධාරණය කළේය.
