සම්පත් බෙදී යාමේ විෂමතාව ඉවත් කර මෙරට සියලු දරුවන්ට සමාන සහ ගුණාත්මක අධ්යාපන පහසුකම් සලසා දීම වත්මන් රජයේ පරම අරමුණ බව රාජ්ය පරිපාලන, පළාත් සභා සහ පළාත් පාලන අමාත්ය මහාචාර්ය චන්දන අබයරත්ත මහතා පැවසීය.
වසර 44ක ඉතිහාසයක් ඇති කරුවලගස්වැව, වීරපුර විද්යාලයේ අභිනවයෙන් ඉදිකරන ලද ගොඩනැඟිල්ල සිසු අයිතියට පත් කිරීමේ අවස්ථාවට එක්වෙමින් අමාත්යවරයා මේ බව සඳහන් කළේය. නගරයේ පාසල්වල මෙන්ම දුෂ්කර ප්රදේශවල පාසල්වල දරුවන් ද මුහුණ දෙන්නේ එකම ජාතික මට්ටමේ ප්රශ්න පත්රයකට බැවින්, සෑම දරුවකුටම සමාන අවස්ථා ලබා දීමේ වැදගත්කම ඔහු අවධාරණය කළේය.
නව අධ්යාපන ප්රතිසංස්කරණ පිළිබඳව කරුණු දැක්වූ අමාත්යවරයා, 9 වසරේදී පවත්වනු ලබන ජාතික මට්ටමේ ඇගයීම් පරීක්ෂණයකින් පසු සිසුන්ගේ කුසලතා සහ රුචිකත්වය මත ශාස්ත්රීය (Academic) හෝ වෘත්තීය (Vocational) යන ක්ෂේත්ර දෙකෙන් එකක් තෝරා ගැනීමට අවස්ථාව පාසල් පද්ධතිය තුළම ලබා දීම වත්මන් රජයේ අරමුණ බව පැවසීය. තාක්ෂණික මෙවලම් භාවිතය, ක්රීඩා සහ අනෙකුත් සහජ කුසලතා සහිත දරුවන් කලින්ම හඳුනාගෙන ඔවුන් ජාතික සහ ජාත්යන්තර තලයට ඔසවා තැබීම මෙම ප්රතිසංස්කරණවල ප්රධාන අරමුණකි.
දේශපාලන මැදිහත්වීම්වලින් තොරව විභාග ලකුණු සහ සුදුසුකම් මත පදනම්ව ගුරුවරුන් බඳවා ගැනීමේ නව සංස්කෘතියක් රජය ආරම්භ කර ඇති බවත්, ඒ අනුව උපාධිධාරී ගුරුවරුන් 3,000ක් බඳවා ගැනීමේ තරග විභාගය මැයි 24 වැනි දින පැවැත්වීමට කටයුතු සූදානම් කර ඇති බවත් ඔහු පැවසීය. එසේම ගුරු සහ විදුහල්පතිවරුන්ගේ මූලික වැටුප සැලකිය යුතු ලෙස ඉහළ නැංවීමට ද පියවර ගෙන ඇත.
අනාගත ලෝකයට ගැළපෙන ‘සුහුරු පුරවැසියකු’ නිර්මාණය කිරීමේ අරමුණින්, දිවයිනේ සෑම පාසලකම අවම වශයෙන් එක් ස්මාර්ට් පන්ති කාමරයක් (Smart Classroom) බැගින් ස්ථාපිත කිරීමේ ඩිජිටල් සහ තාක්ෂණික සංවර්ධන වැඩසටහන මේ වන විටත් සාර්ථකව ක්රියාත්මක වෙමින් පවතින බව අමාත්යවරයා වැඩිදුරටත් සඳහන් කළේය.
