විවිධ රටවල සැඟව සිටින රතු නිවේදන නිකුත් කළ සැකකරුවන් 232 දෙනෙකු පිළිබඳ තොරතුරු ලැබී ඇති බවත්, ඉන් 96 දෙනෙකු සංවිධානාත්මක අපරාධකරුවන් බවත් මහජන ආරක්ෂක අමාත්ය ආනන්ද විජේපාල මහතා අනාවරණය කළේය.
පසුගිය මාස 20ක කාලසීමාව තුළ රතු නිවේදන හරහා අපරාධකරුවන් 23 දෙනෙකු සහ රතු නිවේදන නොමැතිව තවත් 35 දෙනෙකු ලෙස පුද්ගලයින් 58 දෙනෙකු මේ වන විට මෙරටට රැගෙනවිත් තිබේ. හඳුනාගෙන ඇති සංවිධානාත්මක අපරාධකරුවන් 37 දෙනෙකු එක්සත් අරාබි එමීර් රාජ්යයේ 19 දෙනෙකු, ඉන්දියාවේ 11 දෙනෙකු සහ මැලේසියාව, එක්සත් රාජධානිය, ප්රංශය, කැනඩාව, රුසියාව, ඉතාලිය සහ සෞදි අරාබිය යන රටවල එක් අයෙකු බැගින් සැඟව සිටින බව අමාත්යවරයා සඳහන් කළේය.
මෙම පුද්ගලයන් මැදපෙරදිග කලාපයේ සිට මත්ද්රව්ය ජාවාරම් මෙහෙයවන බවත්, ඔවුන් හැකි ඉක්මනින් මෙරටට ගෙන්වා ගැනීමට පියවර ගන්නා බවත් අමාත්යවරයා සහතික විය. එම අපරාධකරුවන්ගේ දෙවැනි සහ තුන්වැනි පෙළ සාමාජිකයන් ද මේ වන විට හඳුනාගෙන ඔවුන්ට එරෙහිව නීතිමය ක්රියාමාර්ග ගනිමින් පවතින බව ඔහු පැවසීය. තවද, සංවිධානාත්මක අපරාධකරුවන් විසින් අනීතිකව උපයාගත් ධනය රාජසන්තක කිරීම සඳහා අවශ්ය කටයුතු සූදානම් කරමින් සිටින බව ද මහජන ආරක්ෂක අමාත්යවරයා වැඩිදුරටත් කියා සිටියේය.
