එම්.ටී.එෆ්.ඊ. (MTFE) නමින් පවත්වාගෙන ගිය නීති විරෝධී පිරමීඩ ආයතනයක ප්‍රධාන අධ්‍යක්ෂවරයකු ලෙස කටයුතු කරමින් ජනතා මුදල් වංචා කළ බවට චෝදනා ලැබ සිටින රන්දුනු දේවගේ දුමින්ද තුෂාර ජයවර්ධන නමැති සැකකරු ලබන 17 වන දින දක්වා යළිත් රක්ෂිත බන්ධනාගාරගත කරන ලෙස කොළඹ ප්‍රධාන මහේස්ත්‍රාත් අසංග එස්. බෝදරගම මහතා අද (03) නියෝග කර තිබේ.
අපරාධ පරීක්ෂණ දෙපාර්තමේන්තුව අධිකරණයට කරුණු දක්වමින් සඳහන් කළේ, සැකකරුගෙන් ලබාගත් ප්‍රකාශ මත ඔහු සතුව තවත් බැංකු ගිණුම් 2ක් ඇති බව අනාවරී වී ඇති බවයි. මෙම ජාවාරම සම්බන්ධයෙන් ප්‍රදේශ 17කින් කළමනාකරුවන් 17 දෙනෙකු ඇතුළු පිරිසකගෙන් සහ සැකකරුගේ පියා හා බිරිඳ ඇතුළු ප්‍රධාන සාක්ෂිකරුවන්ගෙන් ප්‍රකාශ සටහන් කරගෙන ඇති අතර, බිරිඳගේ නිවස පරීක්ෂා කිරීමේදී නඩුවට අදාළ වැදගත් ලේඛන සහ නඩු භාණ්ඩ ද සොයාගෙන ඇත.
සැකකරු වෙනුවෙන් පෙනී සිටි නීතිඥවරයා විමර්ශන සඳහා පූර්ණ සහයෝගය ලබා දී ඇති බව පවසමින් ඕනෑම ඇප කොන්දේසියක් මත සැකකරු මුදාහරින ලෙස ඉල් සිටියද, දෙපාර්ශ්වයේ කරුණු සලකා බැලූ මහෙස්ත්‍රාත්වරයා සැකකරු සිදු කළ පිරමීඩ වංචාව, රත්‍රං මිලදීගත් ස්ථාන, ඒවා විකුණූ ස්ථාන සහ ඒ සඳහා මුදල් උපයාගත් ආකාරය පිළිබඳව පුළුල් ලෙස විමර්ශන සිදු කරන ලෙස විමර්ශන නිලධාරීන්ට නියෝග කළේය.
